Tags-Raat

mujh meñ basī huī thī kisī aur kī mahak
dil bujh gayā ki raat vo barham nahīñ milā

merā muñh kyā dekh rahā hai dekh is kaalī raat ko dekh
maiñ vahī terā hamrāhī huuñ saath mire chalnā ho to chal

raat Dhalne ke ba.ad kyā hogā
din nikalne ke ba.ad kyā hogā

na jaane aaj hai tāroñ ko kyuuñ ye andesha
ye raat bhī na kahīñ jugnuoñ meñ gum ho jaa.e

aadhī raat ko phone bajā

aaj kī raat jaag lo yaaro
vaqt phir hashr tak hai sone ko

bhuul na us ko dhun hai jidhar kī chauñk musāfir raat nahīñ hai
shakl numāyāñ hogī sahar kī chauñk musāfir raat nahīñ hai

āñkheñ malte sehn-e-chaman meñ jhuum ke uTThe niiñd ke maate
dekh sabā ne aa ke ḳhabar kī chauñk musāfir raat nahīñ hai

niile niile rañg ke uupar baḌhtī hī jaatī hai safedī
ho ga.ī rañgat zar-o-qamar kī chauñk musāfir raat nahīñ hai

zor na tāqat sañg na sāthī paañv se apne aap hai chalnā
tujh pe hai bhārī rāh-e-safar kī chauñk musāfir raat nahīñ hai

tujh pe maiñ qurbāñ jaanī pyāre ham-nafas-o-ham-dard hamāre
tujh se hai ulfat maiñ ne ḳhabar kī chauñk musāfir raat nahīñ hai

pañkh-pakherū ḳhvāb se chauñke sab ne ḳhushī ke na.are maare
aa.ī sadā murġhān-e-sahar kī chauñk musāfir raat nahīñ hai

kuuch kī saa.at aa ga.ī sar par 'shād' uThā le jholī-bistar
niiñd meñ saarī raat basar kī chauñk musāfir raat nahīñ hai

mahshar kī is ghaḌī meñ hamārā koī to ho
ai raat ai firāq ḳhudārā koī to ho

zarra zarra hai maz.har-e-ḳhurshīd
jaag ai aañkh din hai raat nahīñ

na koī ḳhushī na malāl hai ki sabhī kā ek sā haal hai
tire sukh ke din bhī guzar ga.e mirī ġham kī raat bhī kaT ga.ī

mirī band palkoñ par TuuT kar koī phuul raat bikhar gayā
mujhe siskiyoñ ne jagā diyā mirī kachchī niiñd uchaT ga.ī

yādoñ se mahaktī huī is raat meñ kyā hai
ye raaz khulā aaj ki jazbāt meñ kyā hai

kiyā thā dafn jise farsh ke tale kal raat
vo aaj chhat se utartā dikhā.ī detā hai

sadā.eñ gūñjtī rahtī haiñ rāt-bhar kis kī
makān vaise to suunā dikhā.ī detā hai