Tags-Raat

raat bhar merī zabāñ par sar-guzasht-e-shām-e-ġham
un ke lab haiñ āshnā-e-lazzat-e-guftār-e-sub.h

vasl kī be-lutfiyāñ bhī lutf se ḳhālī nahīñ
raat bhar dil ko maza detī rahī takrār-e-sub.h

mirī zulfeñ haTā kar ruḳh se vo kahte haiñ hans hans kar
añdherī raat hai aise meñ sharmāyā nahīñ jaatā

tābinda tāroñ kā tohfa sub.h kī ḳhidmat meñ pahuñchā
raat ne chāñd kī nazr kiye jo taare kam chamkīle the

ḳhud raakh hue sub.h talak sach hai ye lekin
ai raat tire jism ko pighlā to ga.e ham

chāñdnī-rāt kā husn chhīnā gayā
kahkashāñ ke piyāle meñ gūñdhā gayā

aañkh meñ Thahrā huā sapnā bikhar bhī jā.egā
rāt-bhar meñ niiñd kā nashsha utar bhī jā.egā

raat aa.ī udhar sitāroñ ne
shabnamī pairahan libās kiyā

ye aadhī raat ko dastak sī kis ne dī dil par
ye kis ne kar diye har samt qumqume raushan

raat kaT jaatī hai bāteñ vahī sunte sunte
sham-e-mahfil sanam-e-charb-zabāñ hai ki jo thā

ye raat ga.e kaun hai is peḌ ke nīche
ik diip sā har shāḳh pe raushan nazar aa.e

maiñ raat kī god meñ sitāre nahīñ sharāre bikhertā huuñ
sahar ke dil meñ jo apne ashkoñ se bo rahā huuñ baġhāvateñ haiñ

zaḳhm kuchh aur sulag jaate haiñ dal ke 'shāhid'
ab to is tāroñ bharī raat se jī Dartā hai

sūraj ko samundar meñ Dubo detī hai har shaam
ārām se ik raat guzarne kī tamannā

din ulaT detā hai har ḳhvāb kī ta.abīr magar
raat dikhlātī hai phir koī nayā ḳhvāb hameñ

kaTtī nahīñ sard raat
Dhaltī nahīñ zard raat

tamām raat vo pahlū ko garm kartā rahā
kisī kī yaad kā nashsha sharāb jaisā thā

kyuuñ merā muqaddar hai ujāloñ kī siyāhī
kyuuñ raat ke Dhalne pe saverā nahīñ hotā

din chhoTā hai raat baḌī hai
mohlat kam aur shart kaḌī hai

ek diyā hai taaq meñ 'shāhīn'
aur sirhāne raat khaḌī hai