Tags-Raat

terī masjid meñ vaa.iz ḳhaas haiñ auqāt rahmat ke
hamāre mai-kade meñ raat din rahmat barastī hai

din hai siine kā ghaav
raat hai kāñTā bistar kā

ye bhī andher ham ne dekhā hai
raat ik zulf meñ simaT jaa.e

raat guzre na dard-e-dil Thahre
kuchh to baḌh jaa.e kuchh to ghaT jaa.e

baare sarishk-e-surḳh ke dāġhoñ se raat ko
bistar par apne sote the ham bhī bichhā.e gul

ik be-yaqīn raat mirī raat kī sharīk
ik be-dayār shaam dil-e-nā-rasā ke saath

vo sard raat jabki safar kar rahā thā maiñ
rañgīniyoñ se zarf-e-nazar bhar rahā thā maiñ

mere siine se lag ke so jaao
palkeñ bhārī haiñ raat bhī kam hai

raat saa.e se bhī jhagḌā kar liyā
ḳhud ko bilkul hī akelā kar liyā

raat be-sudh ho ke so.egī yahāñ
is liye sūraj ne parda kar liyā

avval-e-shab vo bazm kī raunaq sham.a bhī thī parvāna bhī
raat ke āḳhir hote hote ḳhatm thā ye afsāna bhī

raat din dhuup chhāñv kā aalam
kyā tamāshā nazar meñ rakkhā hai

ek diyā kab rok sakā hai raat ko aane se
lekin dil kuchh sambhlā to ik diyā jalāne se

zehn meñ dā.ere se banātā rahā duur hī duur se muskurātā rahā
maiñ samundar nahīñ chāñd ko ilm hai raat bhar phir bhī mujh ko bulātā rahā

kaj-adā.ī kī chādar se muñh Dhāñp kar sone vaalā sar-e-shām hī so gayā
ḳhushk yādoñ ke pattoñ bhare khet meñ saañp sā raat bhar sarsarātā rahā

der tak zard āñdhī sī chaltī rahī saañs bujhtī rahī sham.a jaltī rahī
jaañ pighaltī rahī raat Dhaltī rahī maiñ na rūThā magar vo manātā rahā

yahāñ shaam bhī raat bhī din bhī raushan
gunāhoñ savāboñ kī kis ko ḳhabar hai

udaas raat ke darvāze vā haiñ jaise abhī
dar-e-nigāh se dil meñ koī utarne lage

raat kā koī pahar hai tez havā kā qahr hai
ḳhauf-zada diloñ meñ sab harf duā ke aa.e haiñ

jis par charāġh roz jalātī thī raat ko
dil meñ jo ik mazār thā vo bhī nahīñ rahā