Tags-Raat

aTkā huā sūraj hai isī ek sabaq par
baḌhtā nahīñ din raat kī gardān se aage

ḳhvāb kā kyā hai raat ke naqsh-o-nigār banāo
raat ke naqsh-o-nigār banāo ḳhvāb kā kyā hai

din meñ saarī bastī mele jaisī thī
raat ke manzar qabristānoñ jaise the

isī kī raushnī hai aur isī meñ bhasm honā hai
ye shola shaam kā jo raat bhar bhaḌkā.e rakhte haiñ

nasheb-e-shā.irī meñ hai hamārī zaat se raunaq
yahī patthar hai jis ko raat din luḌhkā.e rakhte haiñ

kiye us ne bazm meñ sho.abde malī mehñdī haath pe sham.a ke
jo patañge raat ko jal ga.e vo tamām murġh-e-hinā hue

raat ke ba.ad na.e din kī sahar aa.egī
din nahīñ badlegā tārīḳh badal jā.egī

raat ke gumbad meñ yādoñ kā baserā ho gayā hai
chāñd kī qindīl jalte hī ujālā ho gayā hai

ḳhāmushī kī āñdhiyāñ bāġhī nazar aatī haiñ mujh ko
raat kaalī hai to sannāTā bhī kaalā ho gayā hai

ye kyā gumāñ hai ki vaqt-e-sahar kī bedārī
jo raat biit chukī hai usī kā ḳhvāb na ho

jo qayāmat kā nahīñ din vo mirā din kaisā
jo taḌap kar na kaTī ho vo mirī raat nahīñ

chashm-e-tar raat mujh ko yaad aa.ī
apnī auqāt mujh ko yaad aa.ī

raat phailī hai tere surma.ī āñchal kī tarah
chāñd niklā hai tujhe DhūñDne pāgal kī tarah

jaise ho koī mere ta.āqub meñ rāt-din
apne vajūd kā hai mujhe Dar paḌā huā

tujhī pe ḳhatm hai jānāñ mire zavāl kī raat
tū ab tulū bhī ho jā ki Dhal rahā huuñ maiñ

talāsh jis ko maiñ kartā phirā ḳharāboñ meñ
milā vo shaḳhs mujhe raat mere ḳhvāboñ meñ

na ho pahlū meñ apne jab vo sabza rañg hī zālim
to phir kis rañg kāTeñ ye balā se raat kaalī ham

zindagī kyā ek sannāTā thā pichhlī raat kā
sham.eñ gul hotī rahīñ dil se dhuāñ uThtā rahā

tai maiñ ne kiyā din kā safar jis kī havas meñ
dekhā to vahī raat kī dāvat meñ nahīñ thā

raat qatra qatra Tapkeñ aañkh se majbūriyāñ
shaam lamha lamha ubhrīñ jaam kī sargoshiyāñ