Tags-Raat

bastī meñ har raat nikalne vaalā chāñd
umr huī na utrā ḳhālī kamre meñ

kabhī vo miltā hai dushmanoñ se kabhī vo miltā hai mujh se aa kar
jo din hai merā to raat un kī jo din hai un kā to raat merī

maiñ us ke vāste sūraj kahāñ se āḳhir lā.ūñ
na jaane raat mujhe kyā samajh rahī hai abhī

raat be-lutf hai parhez ke sālan kī tarah
din bhikārī ke kaTore kī tarah ḳhālī hai

jaane kyā thī baat mujhe kuchh yaad nahīñ
ḳhatm huī kab raat mujhe kuchh yaad nahīñ

sub.h ko dekhā to do ghaav mire chehre pe the
raat kuchh rone kī ḳhvāhish thī magar royā nahīñ

yaad aayā vo TuuT kar 'fārūq'
raat bārish thī kyā qayāmat kī

Dhal chukī raat mulāqāt kahāñ so jaao
so gayā saarā jahāñ saarā jahāñ so jaao

chāñd par hai mujhe terā hī gumāñ aaj kī raat
sūjhtā hī nahīñ kuchh sūd-o-ziyāñ aaj kī raat

dard-e-insān meñ insān miTā jaatā hai
ik na.e ahd kā miltā hai nishāñ aaj kī raat

jāma-e-hastī-e-insāñ hai ba-rañg-e-mātam
uTh rahā hai sham-e-sozāñ se dhuāñ aaj kī raat

ik na.e moḌ pe hai dard-e-mohabbat apnā
dārū-e-dard hai ḳhud dard-e-jahāñ aaj kī raat

ai sitāroñ ke ḳhudāvand ye kyā aalam hai
chāñdnī meñ bhī hai tārīk jahāñ aaj kī raat

kyā hai me.arāj yahī dard kī lazzat apnī
kyā isī meñ haiñ rumūz-e-do-jahāñ aaj kī raat

duur se aatī haiñ kānoñ meñ diloñ kī aaheñ
kyā inhīñ meñ hai ḳhudā-vand-e-jahāñ aaj kī raat

jo bhī mazlūm hai dil us ke liye rotā hai
merī har saañs meñ hai shor-e-fuġhāñ aaj kī raat

ye añdherī raat benām-o-nishāñ kar jā.egī
apne chehre par sunahrī dhuup kā ġhāza lagā

ham-ḳhayāl o ham-navā bhī tujh ko mil hī jā.eñge
raat ke tanhā musāfir koī āvāza lagā

ye jab se raat buzdil ho ga.ī hai
diye kī jañg mushkil ho ga.ī hai

ab ye sūrat hai ki imkāñ hī nahīñ furqat kā
un se din-rāt mulāqāt kahāñ thī pahle