Tags-Raat

dil kī kahānī kahte kahte
raat kā āñchal bhiig chalā thā

raat ga.e soyā thā lekin
tujh se pahle jaag uThā thā

raat meñ soyā thā dariyā ke qarīb
ḳhvāb meñ ik jal-parī mahsūs kī

gharoñ meñ Dhaltī huī raat thak ke baiTh ga.ī
ki ab fasāna-e-dīvār-o-dar tamām huā

vo chāñd-rāt terā bichhaḌnā nazar meñ hai
is ghar meñ tere ba.ad kahāñ raushnī huī

hāl-e-dil pūchhne vaale tirī duniyā meñ kabhī
din to hotā hai magar raat nahīñ hotī hai

dil kā ye dasht arsa-e-mahshar lagā mujhe
maiñ kyā balā huuñ raat baḌā Dar lagā mujhe

chand zarre ki jin kī ragoñ meñ
siyah raat kī zulmateñ bas chukī thiiñ

Duub jā.eñge sitāre aur bikhar jā.egī raat
dekhtī rah jā.eñgī āñkheñ guzar jā.egī raat

raat kā pahlā pahr hai ahl-e-dil ḳhāmosh haiñ
sub.h tak rotī huī āñkhoñ se bhar jā.egī raat

aarzū kī be-hisī kā gar yahī aalam rahā
be-talab aa.egā din aur be-ḳhabar jā.egī raat

raushnī kaisī agar aalam añdherā ho gayā
dil meñ bas jā.egī āñkhoñ meñ utar jā.egī raat

koī aahaT bhī na sun pā.egā ḳhvābīda chaman
ḳhushk pattoñ par dabe paañv guzar jā.egī raat

dil meñ rah jā.eñge tanhā.ī ke qadmoñ ke nishāñ
apne pīchhe kitnī yādeñ chhoḌ kar jā.egī raat

shaam hī se so ga.e haiñ log āñkheñ muuñd kar
kis kā darvāza khulegā kis ke ghar jā.egī raat

der tak 'shahzād' āñkhoñ meñ phiregī chāñdnī
kaT to jā.egī magar kyā kuchh na kar jā.egī raat

sub.h hone de Tuk tū raat hai abhī baaqī
tujh ko ghar ke jaane kī aisī kyā shitābī hai

hasrat ye hai ki raat ko aa.e vo māh-rū
daulat se us kī diid karūñ māhtāb kā

tum ko hai bahut inkār to tum bhī is kī taraf jā kar dekho
vo shaḳhs amāvas raat ko kaise chāndnī raat banā.e hai

ye terā divāna raat ga.e mālūm nahīñ kyuuñ pahroñ tak
aañsū kī lakīroñ se kitne naqsh-e-jazbāt banā.e hai