Tags-Raat

raat hote hī
ḳhvāboñ kā chhakḌā chal paḌtā hai

jab bhī likkhā hāl-e-dil-e-muztar maiñ ne us ko raat ga.e
tā-ba-sahar ashk-afshānī se zaa.e.a vo tahrīr huī

raat ga.e jab taare bhī kuchh be-ma.anī se lagte haiñ
ek dabistāñ khultā hai un āñkhoñ kī tafsīroñ kā

raat ke dasht meñ TuuTī thī havā kī zanjīr
sub.h mahsūs huī ret kī jhankār mujhe

bojhal bojhal palkoñ par
raat abhī tak taarī hai

mirī hayāt hai bas raat ke añdhere tak
mujhe havā se bachā.e rakho savere tak

sutūn-e-dār pe rakhte chalo saroñ ke charāġh
jahāñ talak ye sitam kī siyāh raat chale

ham kabhī niiñd bhar na so paa.e
raat jaage to din meñ kaam kiyā

jamā karnā tah-e-mizhgāñ tujhe qatra qatra
raat bhar phir tujhe TukḌoñ meñ rivāyat karnā

thī nazāre kī ghaat āñkhoñ meñ
kaT ga.ī saarī raat āñkhoñ meñ

vo shaam se aarzū sahar kī vo be-kalī raat raat bhar kī
un āshnā āshnā sitāroñ kī yaad sī rah ga.ī hai baaqī

raat ik shahr ne taaza kiye manzar apne
niiñd ā.ankhoñ se uḌī khol ke shahpar apne

vaqt par tāroñ ne chhoḌā āsmāñ
raat din meñ Dhal ga.ī tartīb meñ

shahr sotā hai raat jaatī hai
koī tūfāñ hai parda-dar ḳhāmosh

bujh ga.ī sham.a kaTī raat ga.ī sab mahfil
ab akele hī kaTegā safar-e-parvāna

in añdheroñ se hī sūraj kabhī niklegā 'nazīr'
raat ke saa.e zarā aur nikhar jaane de

raat chaupāl aur alaav miyāñ
ab kahāñ gaañv kā subhāv miyāñ

shaam kā va.ada kiyā aa.e vo aadhī raat ko
jazba-e-dil kī mire tāsīr aadhī rah ga.ī

samajh rahā thā maiñ jise suhāg raat kī vishāl rut
mire qarīb aate aate vo qayās ho ke rah ga.ī

terā hī aks raat ke ā.īne meñ asiir
terā hī ḳhvāb niiñd ke bistar pe naqsh hai