Tags-Raat

ġhazab kiyā tire va.ade pe e'tibār kiyā
tamām raat qayāmat kā intizār kiyā

mile jo yaar kī shoḳhī se us kī bechainī
tamām raat dil-e-muztarib ko pyaar kiyā

ye lai hai ki khiltī huī ġhunche kī kamānī
mahkā huā ye tan hai ki ye raat kī raanī

be-sadā kāġhazoñ meñ aag lagā
aaj kī raat gungunā mujh ko

ab raat kī dīvār ko Dhānā hai zarūrī
ye kaam magar mujh se akele nahīñ hogā

ḳhudā ne banā.ī hai ye kā.enāt
ye phal phuul paude ye din aur raat

tamām raat mahaktā thā us kī Table par
gulāb-e-tāza kī ḳhushbū meñ february kā shor

ghar ko jaate hue sharm aatī hai
raat kā ek bajā chāhtā hai

kyā chāra kareñ kyā sabr kareñ jab chain hameñ din-rāt nahīñ
ye apne bas kā rog nahīñ ye apne bas kī baat nahīñ

āsmānoñ se zamīnoñ pe javāb aa.egā
ek din raat Dhale yaum-e-hisāb aa.egā

ye raat raat bhī hai oḌhnā-bichhaunā bhī
is ek raat meñ hai jāgnā bhī sonā bhī

raushnī fasīloñ ko toḌ kar bhī aa.egī
raat kī syāhī ko karvaTeñ badalne do

shīsha-e-shab meñ bharī hai 'fauq' jo sahbā-e-kaif
qatra qatra bhī piyūñ to raat bhar kaafī nahīñ

raat ke koī baara baje hoñge
garmī hai

raat us ko ḳhvāb meñ dekh kar
maiñ ne kuchh nahīñ kahā

raat us ko ḳhvāb meñ dekh kar
chaar saal jaise phir usī tarah guzar ga.e

raat mere liye gintī hai 'tarāz' apne nujūm
mere hone kā magar raaz nahīñ detī hai

saare chaqmāq-badan aayā thā tayyārī se
raushnī ḳhuub huī raat kī chiñgārī se

ye din to raat meñ Dhaltā nazar nahīñ aatā
bhalī thī shab ki guzar to ga.ī sahar to huī

maiñ ab bhī raat ga.e us kī guuñj suntā huuñ
vo harf kam thā bahut kam magar sadā thā bahut