Tags-Raat

raat jo āñkhoñ meñ chamke jugnū maiñ un kā shāhid huuñ
aap bhale charchā kariye ab sūraj kī tābānī par

sub.h-saverā daftar biivī bachche mahfil nīndeñ raat
yaar kisī ko mushkil bhī hotī hai is āsānī par

ham sochte haiñ raat meñ tāroñ ko dekh kar
sham.eñ zamīn kī haiñ jo daaġh āsmāñ ke haiñ

jī bhar ke tumheñ dekh luuñ taskīn ho kuchh to
mat sham.a bujhāo ki abhī raat bahut hai

raat petrol kī aag se shahr meñ yuuñ charāġhāñ huā
kaañp kar bujh ga.iiñ dil ke raushan jharokoñ kī sab battiyāñ

kar diyā dhuup ne jab shahr ko sāyoñ ke sipurd
phir to din meñ bhī ka.ī raat ke manzar aa.e

mire ḳhayāl meñ haiñ ye tajalliyāñ kis kī
añdherī raat meñ bhī mujh ko tīrgī na milī

añdherī raat ke sāñche meñ Dhāle jā chuke the ham
bahut hī der se aa.e ujāle jā chuke the ham

Dasā rat-jagoñ ne hai ḳhvāboñ ko phir se
sulagtī huī rāt-rānī kahe hai

falak se ghūrtī haiñ mujh ko be-shumār āñkheñ
na chain aatā hai jī ko na raat Dhaltī hai

numūd-e-sub.h ko detā sadā chalā aa.e
hamārī raat meñ baaqī hai aisā ḳhvāb kahāñ

ab ke ye soch ke tum zaḳhm-e-judā.ī denā
dil bhī bujh jā.egā Dhaltī huī is raat ke saath

batā kar duudh jab paanī diyā thā saath roTī ke
yuuñ maañ kā raat phir bachchoñ ko bahlānā zarūrī thā

aziyyat raat khāne meñ parosī muflisī ke saath
'hiyā' kā hausla phir saath meñ khānā zarūrī thā

jo samundar mire atrāf ravāñ hai sar-e-ḳhāk
DhūñDhtā rahtā huuñ din-rāt kināre us ke

ye qit.a paḌhe thā soz-e-dil se
saudā ke jo raat ghar ga.e ham

vo dard mol ki ho rāt-din kī niiñd harām
to dekh aah meñ kaisā asar nahīñ aatā

aah naale dard-o-ġham aḳhtar-shumārī raat kī
ai masīh-e-vaqt in sab kī davā to ek hai

va.ade kī kaun raat qayāmat kā din nahīñ
āsār-e-sub.h kahte haiñ ye raat bhī ga.ī

har sub.h maiñ ne ḳhud ko ba-mushkil baham kiyā
aa.ī jo ġham kī raat to bikhrā ga.ī mujhe