Tags-Raat

mukhḌe ke ka.ī ruup dūdhiyā chāñdnī bhor sunahrī dhuup
raat kī kaliyāñ chuTkī chuTkī sī bāloñ ke ban ke beach

ajiib baat thī har sher pur-asar Thahrā
maiñ is kī bazm meñ kal raat bā-hunar Thahrā

vaqt kā pahiya chalā aur raat gahrī ho ga.ī
shaam aa.ī din Talā aur raat gahrī ho ga.ī

itnā raushan thā badan maiñ din hī rahtā thā mudām
be-sabab hī dil jilā aur raat gahrī ho ga.ī

āḳhirī dīdār thā tayyār thā jis ke liye
aisā mushkil marhala aur raat gahrī ho ga.ī

jāgne vaale na the jo dekhte us kī chamak
niiñd sab kā mashġhala aur raat gahrī ho ga.ī

maiñ use kahne hī vaalā thā ujālā thā abhī
kar bhalā so ho bhalā aur raat gahrī ho ga.ī

raat to pahle se thī jab baap sā sūraj na thā
chāñd sā bhaa.ī Dhalā aur raat gahrī ho ga.ī

pī nahīñ sakte the paanī dekh to sakte the ham
ek to ye karbalā aur raat gahrī ho ga.ī

us taraf tūfān aayā aur din lambā huā
ham par aayā zalzala aur raat gahrī ho ga.ī

sun rahe ho jaise hī abyaz ne 'asvad' se kahā
pur karo merā ḳhalā aur raat gahrī ho ga.ī

bujh ga.e shoḳh darīchoñ meñ damakte mahtāb
so ga.e raat kī taqdīr jagāne vaale

lekin mujhe ye shaam jagā.egī rāt-bhar
din kā har ek zaḳhm to bhartā huā sā hai

ye kyā huā ki tabī.at sambhaltī jaatī hai
tire baġhair bhī ye raat Dhaltī jaatī hai

ka.ī dinoñ se jism o jaañ par ik be-kaifī chhā.ī hai
bhiig rahī hai raat sunāo koī ġhazal darbārī meñ

ham ġharīboñ ke roz-o-shab na pūchh
din meñ bhī jāgte haiñ raat ke dukh

is raat ke gambhīr añdhere meñ hai kyā kyā
hāsil tujhe par dīda-e-bedār nahīñ hai

maiñ apnī zindagī kī note-bōk se kitnī rāteñ kitne din kāTūñ
ki ik ik raat meñ kitnī qayāmat-ḳhez rāteñ mujh pe TuuTī haiñ

sahar ko ruḳhsat-e-bīmār-e-furqat dekhne vaalo
kisī ne ye bhī dekhā raat bhar tāroñ pe kyā guzrī

din meñ jahāñ sarāb mile the hameñ vahāñ
aa.ī jo raat qatra-e-shabnam mile hameñ