Tags-Raat

karūñ zikr kyā maiñ shabāb kā sune kaun qissa ye ḳhvāb kā
ye vo raat thī ki guzar ga.ī ye vo nashsha thā ki utar gayā

maiñ jin logoñ kī sūrat se huuñ be-zār
unhī meñ raat din rahtā bhī huuñ maiñ

khul gayā raaz sitāre haiñ baġhāvat ke nishāñ
raat kyuuñ ḳhauf ke āsār liye phirtī hai

tanhā.ī ke lamhāt kā ehsās huā hai
jab tāroñ bharī raat kā ehsās huā hai

raat bhar kuttā us ke peT meñ bhauñk rahā thā
kaisī kaisī āvāzeñ thiiñ

raat aa.ī hai a-k-shaiḳh ab ghar aayā hai
kuttā us ke peT meñ phir se bhauñk paḌegā

phir sāmne hai pahāḌ sī raat
phir shaam se niiñd uchaT ga.ī hai

uTh uTh ke marīz-e-ġham ne pūchhā
kyā hijr kī raat kaT ga.ī hai

aaj kī raat divālī hai diye raushan haiñ
aaj kī raat ye lagtā hai maiñ so saktā huuñ

zauq-e-tulū-e-sub.h bhī degī ye tīrgī tujhe
raat tavīl hai to kyā dil kā diyā jalā.e jā

bhūlī huī yaad aa ke kaleje ko male hai
jab shaam guzar jaa.e hai jab raat Dhale hai

hamāre shahr meñ kuchh log aise rahte haiñ
safar kī samt batāte haiñ jin ko raat ke rañg

jhulas gayā huuñ jalā huuñ dhuāñ dhuāñ ho kar
añdherī raat se tum ko bachā liyā maiñ ne

aaj qismat se nazar aa.ī hai barsāt kī raat
kyā bigaḌ jā.egā rah jaao yahīñ raat kī raat

un kī pā-bosī ko jaa.e to sabā kah denā
aaj tak yaad hai vo aap ke gujrāt kī raat

jis meñ salmā ke tasavvur ke haiñ taare raushan
merī āñkhoñ hai vo ālam-e-jazbāt kī raat

haa.e vo mast ghaTā haa.e vo salmā kī adā
aah vo rūd-e-chanāb aah vo gujrāt kī raat

mere siine meñ idhar zulf-e-muattar kā hujūm
aah vo zulf ki āvāra ḳharābāt kī raat

sat.h-e-doyā pe idhar nashshe meñ lahrā.ī huī
rañg laa.ī huī chhā.ī huī barsāt kī raat

uf vo soī huī khoī huī fitrat kī bahār
uf vo mahkī huī bahkī huī barsāt kī raat