Tags-Raat

raat bhī hai kuchh suunī suunī din bhī kuchh vīrān sā hai
phuul bhī haiñ kuchh sahme sahme baaġh bhī kuchh hairān sā hai

din se jo bhī raat milī hai girya kī dīvār sī hai
raat se jo bhī din paayā hai nuuh kā ik tūfān sā hai

raat bhī din kī tarah merī pareshāñ guzrī
maiñ na jaagā to mire ḳhvāb kā paikar jaagā

sub.h hote hī ḳhudā jaane chalā jaa.e kidhar
rāt-bhar shāḳh pe is ġham meñ gul-e-tar jaagā

ye raat hogī tavīl kitnī
buland hogī fasīl kitnī

raat bhar gūñjī hai ākāsh meñ birhā kī tarañg
raat bhar soyā nahīñ bhairavī gaane vaalā

zindagī chhoḌ ne aa.ī mujhe darvāze tak
raat ke pichhle pahar maiñ jo kabhī ghar aayā

ai sham.a tujh pe raat ye bhārī hai jis tarah
maiñ ne tamām umr guzārī hai is tarah

rāt-bhar chāñdnī Takrā.ī magar
sub.h hote hī khule darvāze

kyuuñ dard ke naame likhte likhte raat karo
jis saat samundar paar kī naar kī baat karo

jo sham.a itnī raat jalī kyuuñ vo bujh ga.ī
jo shauq ho chalā thā fuzūñ kaun le gayā

raat ke farsh par
maut kī āhaTeñ

chand lamhoñ ke liye ek mulāqāt rahī
phir na vo tū na vo maiñ aur na vo raat rahī

zamīn vāloñ zamīñ kī na dāstāñ pūchho
guzishta raat hī maiñ āsmāñ se lauTā huuñ

gard meñ aT rahe haiñ ehsāsāt
dhīme dhīme baras rahī hai raat

sub.h jaagā to yaad bhī na rahā
raat thī chāñdnī ki chāñdnī raat

kal raat āsmān mirā mehmāñ rahā
kyā jaane kyā kashish thī mire iltimās meñ

hazār bandish-e-auqāt se nikaltā hai
ye din nahīñ jo mirī raat se nikaltā hai

is Dar se maiñ ne zulf kī us kī na baat kī
jaatī hai duur duur tak āvāz raat kī

tīrgī hī tīrgī hadd-e-nazar tak tīrgī
kaash maiñ ḳhud hī sulag uTThūñ añdherī raat meñ