Tags-Rahbar

vo raah sujhāte haiñ hameñ hazrat-e-rahbar
jis raah pe un ko kabhī chalte nahīñ dekhā

ham-nafas tum the tum hī dil-bar the
ham-safar tum the tum hī rahbar the

kis samt jā rahe haiñ unheñ ḳhud patā nahīñ
yuuñ be-ḳhabar to raah se rahbar kabhī na the

ham se 'ābid' apne rahbar ko shikāyat ye rahī
aañkh mūñde un ke pīchhe chalne vaale ham nahīñ

ham-safar ban ke mile yā bane rahbar apnā
koī to pūchhe ki manzil kā patā huuñ maiñ bhī

mujh se hī pūchh rahā hai mirī manzil kā pata
mere rahbar kī zarā rāh-barī to dekho

is husn-e-zan pe ham-safaroñ ke huuñ pā-ba-gil
mujh be-ḳhabar ko rahbar-e-manzil banā diyā

sharh-e-hañgāma-e-hastī hai zahe mausam-e-gul
rah-bar-e-qatrā-ba-dariyā hai ḳhoshā mauj-e-sharāb

ye kaisī hai rāh-barī
raahī chup to rahbar chup

luT ga.ī jaan to ummīd ke pahlū DhūñDe
miT ga.ī raah to andesha-e-rahbar guzrā

manzil qarīb aa.ī to rasta bhulā gayā
phirte haiñ ḳhaak chhānte rahbar ke shahr meñ

vo kal bhī mo'atabar thā aaj bhī rahbar hamārā hai
vo dushman jo vatan kī khokhlī buniyād kartā hai

rahbar-e-ḳhizr-o-hādī-e-ilyās
mujh ko vo rahnumā diyā tū ne

na pata sañg-e-nishāñ kā na ḳhabar rahbar kī
justujū meñ tire dīvāne yahāñ tak pahuñche

ye rahbar aaj bhī kitne purāne lagte haiñ
ki peḌ duur se rasta dikhāne lagte haiñ

jo rahbar kārvāñ ko manziloñ ke naam par luuTe
batā ai ham-safar achchhī nahīñ kyā gumrahī apnī

manzileñ ishq kī mushkil thiiñ ḳhatarnāk bhī thiiñ
mil gayā dil sā magar rahbar-e-kāmil mujh ko

jo har manzil meñ rahbar thā vo ab bhī saath hai varna
yahāñ har gaam par laġhzish kā imkāñ hai jahāñ maiñ huuñ

saath har ek ko is raah meñ chalnā hogā
ishq meñ rahzan o rahbar nahīñ dekhe jaate

rahbar bhī ye hamdam bhī ye ġham-ḳhvār hamāre
ustād ye qaumoñ ke haiñ me.amār hamāre