Tags-Rang

ik sail-e-rañg-o-nūr se jal-thal hai kā.enāt
kaisā ye tere jalvoñ kā bādal baras gayā

be-rañg the aarzū ke ḳhāke
vo dekh rahe haiñ muskurā ke

din bhī shab-rañg ban ga.e apne
pahle sūraj se aañkh miltī thī

maiñ ne bas ik nigāh meñ tai kar liyā tujhe
tū rañg-e-bekarāñ na huā kuchh nahīñ huā

dil vo sahrā hai jahāñ hasrat-e-sāya bhī nahīñ
dil vo duniyā hai jahāñ rañg hai ra.anā.ī hai

rañg-e-mahfil badaltā rahtā hai
rañg koī vafā nahīñ kartā

kaafī thā yuuñ to rañg-e-tamāshā ba-zāt-e-ḳhud
jo bach rahā vo kaam tamāshā.ī se huā

rañg āñkhoñ meñ ajab qaus-e-quzah ke ghul ga.e
dīdanī hai mauj meñ aanā lahū kī lahr kā

baaġh kā baaġh lahū rañg huā jaatā hai
vaqt masrūf hai kaisī chaman-ārā.ī meñ

tum rañg ho tum nuur ho tum shīsha ho tum jaam
kirnoñ se bharī sub.h ho tāroñ se bharī shaam

bayāñ karne ko hai tarz-e-tapāk-e-dostāñ kaafī
ab is duniyā meñ kyā rañg-e-ġhurūr-e-dushmanāñ likhiye

miT jā.eñgī peshānī-e-marmar se lakīreñ
ab rañg utar jā.egā tā.ūs ke par kā

Duubā huā aivān-e-shafaq bhī hai dhueñ meñ
be-rañg sā har naqsh hai dīvār-e-sahar kā

chaman ne phuul diye aur shafaq ne rañg diyā
shuā.eñ chāñd ne diiñ terī rahguzar ke liye

yaad kyā kyā log dasht-e-be-karāñ meñ aa.e the
rañg lekin kab ye chashm-e-ḳhūñ-fishāñ meñ aa.e the

rah gayā 'mushtāq' dil meñ rañg-e-yād-e-raftagāñ
phuul mahñge ho ga.e qabreñ purānī ho ga.iiñ

yahī zaḳhm-e-dil jo nasīb hai yahī soz-e-dil kā naqīb hai
ye mire ḳhulūs kā rañg hai kisī nāznīñ kī atā bhī hai

rañg pastī ke phir bhī na ifshā hue
yuuñ to pātāl tak āsmāñ bhī gayā

rañg-e-sanam-kada jo zarā yaad aa gayā
TūTīñ vo bijliyāñ ki ḳhudā yaad aa gayā

maiñ to ik raqs thā kuchh rañg-bhare zarroñ kā
raaz ye ahl-e-zamāna pe khulā mere ba.ad