Tags-Rang

ġhazal is bahr meñ kyā tum ne likhī hai ye 'nasīr'
jis se hai rañg-e-gul-e-ma.anī-e-mushkil Tapkā

log rakhte haiñ zarā.at se zamīneñ ḳhush-rañg
ham bhī dekheñ kisī poshāk ko dhānī kar ke

go bhuul gayā huuñ maiñ tujhe to bhī tirā rañg
jhalke hai mire dīda-e-hairān meñ kitnā

maiñ ne har rañg sameTā us kā
aur tasvīr banā.ī bhī nahīñ

aañsū haiñ kafan-posh sitāre haiñ kafan-rañg
lo chaak kiye dete haiñ dāmān-e-sahar ham

vo qadd-e-nāz aur vo chehre kā husn o rañg
jaise ho phuul shāḳh pe koī khilā huā

tujh chehra-e-gul-rañg niiñ ḳhūbāñ ko gul-gūnī diyā
tere lab yāqūt ne mujh dil kuuñ pur-ḳhūnī diyā

yahāñ jo bhī thā vo tujhī se thā yahāñ jo bhī hai vo tujhī se hai
sabhī aks haiñ tirī zaat ke sabhī rañg the tire naam ke

rañg-e-hinā se surḳh rahīñ un kī uñgliyāñ
ai kaash saarī umr vo dūlhan banī raheñ

rañg-o-ḳhushbū kā kahīñ koī kare zikr to baat
ghuum phir kar tirī poshāk pe aa jaatī hai

zamāne tujh se tauba kar rahā huuñ
badan kā rañg niilā kar rahā huuñ

tasvīroñ ke maddham rañg batāte haiñ
apne ko pahchān na pā.ūñgī maiñ bhī

kis kis rañg meñ ilhāmāt utarte haiñ
kis kis kī rūdādeñ likkhūñgī maiñ bhī

kisī ke haath se TuuTe na shīsha-e-sad-rañg
ye reza reza bikhar jā.egā kabhī na kabhī

hairān rañg bāġh-e-jahāñ thā bahut rukā
tasvīr kī kalī kī tarah dil na vā huā

jitne ḳhizāñ ke Dhañg haiñ jitne fazā meñ rañg haiñ
mere hī ḳhār-o-ḳhas se haiñ mere hī rañg-o-bū se haiñ

hairat meñ nahīñ Dāltā ab shahr-e-gumāñ ko
har roz lahū-rañg meñ aḳhbār kā honā

terī ḳhush-rañg chūḌiyāñ ab tak
zehn meñ baj rahī haiñ kuchh aise

palaT ke ā.eñge sāvan ke rañg ā.ankhoñ meñ
tum apne-āp se rishta bahāl kar dekho

jalva-e-fitrat numāyāñ hai libās-e-rañg meñ
husn har tahzīb meñ minnat-kash-e-poshāk thā