Tags-Rang

dil ke gulshan meñ tire pyaar kī ḳhushbū pā kar
rañg ruḳhsār pe phūloñ se khilā karte haiñ

ThiThurte phuul pe tasvīr-e-rañg-o-bū kab tak
jhulastī shāḳh pe barg-e-hinā hai kitnī der

diloñ ke rañg ajab rābta hai kitnī der
vo āshnā hai magar āshnā hai kitnī der

fazāoñ meñ hai sub.h kā rañg taarī
ga.ī hai abhī girls college kī laarī

rañg-e-talab hai kaun sī manzil meñ kyā kaheñ
āñkhoñ meñ mudda.ā nahīñ lab par sadā nahīñ

qāfiye aate ga.e aur maiñ unheñ paiham pirotā hī gayā afkār meñ
is liye barjastagī kā rañg aur āhañg hai mere hasīn o dil-nashīñ ash.ār meñ

us ne ḳharīdne haiñ ka.ī saat rañg ḳhvāb
ham ne siyāh niiñd kamānī hai aur bas

maiñ ek muddat se is jahāñ kā asiir huuñ aur sochtā huuñ
ye ḳhvāb TūTegā kis qadam par ye rañg chhūTegā kab lahū se

dekh rānā.i-e-haqīqat ko
ishq ne bhar diyā hai rañg-e-majāz

dasht-e-ulfat meñ kaḌī dhuup ke sannāTe haiñ
abr-e-ḳhush-rañg na saa.e kā guzar rahtā hai

tamām rañg-e-ibārat meñ soz-e-jāñ se mire
maiñ husn-e-zāt huuñ aur manzil-e-jamāl meñ huuñ

maiñ loT ho gayā huuñ ḳhat-e-sabz-rañg par
ḳhār-e-chaman se dāman-e-dil pe aTak gayā

jo rañg un kā badal chalā hai to shauq ab hai na valvala hai
bahut hī nāzuk muāmla hai visāl-e-ma.ashūq-e-nāznīñ kā

kalī na dāman kī muskurā.e na āstīñ terī gul khilā.e
maiñ sadqe qātil na rañg laa.e ye ḳhuun dāman kā āstīñ kā

chhup ke baiThegā kahāñ tū ham se ai rañgīñ-navā
hogā tū jis rañg meñ mil jā.eñge us rañg se

'zauq' zebā hai jo ho rīsh-e-safed-e-shaiḳh par
vasma āb-e-bañg se mehñdī mai-e-gul-rañg se

rañg-e-mahfil tirā baḌhāne ko
aa.e ham chashm-e-ḳhūñ-fishāñ le kar

barq kyā sharāra kyā rañg kyā nazāra kyā
har diye kī miTTī meñ raushnī tumhārī hai

hasad kā rañg pasandīda rañg hai sab kā
yahāñ kisī ko koī ab duā nahīñ detā

hai tirī mashq-e-sitam kā rañg agar yūñhī to phir
dekhā lenā ek din tere sivā koī nahīñ