Tags-Rang

rañg dukānoñ kī ra.anā.ī ḳhushbū dargāhoñ kī zīnat
zulf-e-mo.ambar ab ban ambar sej suhāg se uud gayā

kundanī rañg kā maiñ kushta huuñ
kyuuñ na ho merī za.afrānī ḳhaak

rañg ho raushnī ho yā ḳhushbū
sab meñ partav usī hasīñ ke haiñ

ham is liye na.ī duniyā ke saath chal na sake
ki jaise rañg ye badlī hai ham badal na sake

hazrat-e-'manzar' nahīñ haiñ vā.izo is rañg ke
aaj mai-ḳhvārī kareñ kal baiTh kar taubā kareñ

tire baġhair hai be-rañg raunaq-e-gulshan
ye aur baat ki khulte haiñ phuul gulshan meñ

rañg-e-parīdañ qāsid bād-e-sahar kabūtar
kis kis ke ham havāle maktūb kar chuke haiñ

baḳhshe bahār ko jo na shā.istagī kā rañg
aisī har ek shai ko chaman se nikāl de

kise dekhūñ kaho lagūñ kis ke gale shab-e-vasl meñ mujh se jo tū ye kahe
ki ye bāda-e-surḳh tū pī le tujhe mire hāthoñ ke rañg-e-hinā kī qasam

kasrat-e-vahdāniyat meñ husn kī tanvīr dekh
dīda-e-haq-bīñ se rañg-e-ālam-e-tasvīr dekh

mailā ho rañg us kā gar chāñdnī meñ nikle
chashm-e-falak ne aisā nāzuk-badan na dekhā

har ek rañg tire ruup kī jhalak le le
koī hañsī koī lahja koī mahak le le

kyā kyā na rañg tere talabgār lā chuke
mastoñ ko josh sūfiyoñ ko haal aa chuke

sochūñ to yahāñ kuchh bhī nahīñ dekhne qābil
dekhūñ to tirī duniyā baḌī rañg bharī hai

aañkh se kaT kaT jaate the saare manzar
raat se rañg-e-dīda-e-hairāñ barham thā

mauj-e-rañg aa.ī kuchh is taur ki dil jhuum uThā
hosh gum kar diye sarmast hinā ne mere

mohabbat mirī rañg laane lagī hai
ki un kī nazar muskurāne lagī hai

chāñd sī un kī vo ḳhush-rañg qabā vo dastār
un kī darveshī pe qurbān ḳhazāne mere

suḳhan se rañg gayā zindagī se ḳhvāb ga.e
ye zaḳhm hijr kā kyuuñ indimāl ham ne kiyā

qatār jugnuoñ kī raushnī luTātī rahī
maiñ rañg gūñdh ke titlī ke par banātī rahī