Tags-Rang

bahut se ḳhūn-ḳharābe macheñge ḳhāna-ḳharāb
yahī hai rañg agar tere paan khāne kā

bazm-e-rañg-o-naġhma meñ kaun multafit hogā
āh-e-nā-kashīda ham harf-e-nā-shanīda ham

un se chheḌ dete ham rañg-o-nūr kī bāteñ
dāstān-e-shauq apnī ḳhud hī chhiḌ ga.ī hotī

ruḳh se parda uThā de zarā sāqiyā bas abhī rañg-e-mahfil badal jā.egā
hai jo behosh vo hosh meñ aa.egā girne vaalā hai jo vo sambhal jā.egā

shāyad yahī mazāq-e-talab kī hai intihā
duniyā-e-rañg-o-bū meñ bhī dil be-talab huā

ye bujhī sī shaam ye sahmī huī parchhā.iyāñ
ḳhūn-e-dil bhī is fazā meñ rañg bhar saktā nahīñ

tamām nūr-e-tajallī tamām rañg-e-chaman
ye terā chāñd sā chehra ye terā gul sā badan

ye husn-e-ḳhatm-e-safar ye tilism-ḳhāna-e-rañg
ki aañkh jhapkūñ to manzar nayā hai mere liye

qadam qadam mirī vīrāniyoñ ke rañg-mahal
diloñ ko zaḳhm kī sauġhāt-e-ḳhusravāna mile

maiñ sabz rañg kā chashma pahan chukā thā 'kalīm'
mirī nigāh meñ manzar lahūluhān na thā

mat pūchh ki kyā rañg hai zabt-e-ġham-e-dil meñ
har ashk jo piitā huuñ vo hiire kī kanī hai

mire nāloñ kā 'āshiq' rañg uḌāyā andalīboñ ne
ḳhirām-e-yār kī shohrat huī saare chakoroñ meñ

vo jalva-e-sad-rang meñ ik Dhañg se niklā
jo misra tire sīna-o-āhañg se niklā

chahchahā rañg mire ḳhuun kā sā
tire paañv kī hinā rakhtī hai

na.ī havā meñ koī rañg-e-kā.enāt meñ gum
huā hai saarā zamāna tasannuāt meñ gum

tire ba.ad bhī vahī Dhañg haiñ vahī naḳhl-soḳhta rañg haiñ
vahī intizār-e-tuyūr hai vahī barg-e-sabz ke ḳhvāb se

allāh-re faroġh us ruḳhsār-e-ātishīñ kā
sham.oñ ke rañg misl-e-kāfūr uḌā diye haiñ

sāmne sad-rañg nusḳhe, mashvare
zindagī sadiyoñ se kuchh bīmār sī

gulshan meñ the to raunaq-e-rañg-e-chaman bane
jañgal meñ ham amānat-e-bād-e-sabā rahe

surḳhī bane to ḳhūn-e-shahīdāñ kā rañg the
raushan hue to mash.al-e-rāh-e-baqā rahe