Tags-Rang

nayā maslak nayā rañg-e-suḳhan ījād karte haiñ
urūs-e-sher ko ham qaid se āzād karte haiñ

bām-o-dar par utarne vaalī dhuup
sabz rañg-e-malāl rakhtī hai

har aan ḳhushī se aapas meñ sab hañs hañs rañg chhiḌakte haiñ
ruḳhsār gulāloñ se gul-gūñ, kapḌoñ se rañg Tapakte haiñ

ye ruup jhamaktā dikhlāyā ye rañg dikhāyā holī ne

yā svāñg kahūñ yā rañg kahūñ yā husn batā.ūñ holī kā
sab abran tan par jhamak rahā aur kesar kā māthe Tiikā

shaam hī se baras rahī hai raat
rañg apne sambhāl kar rakhnā

'nāsir' o 'bānī' sā tujh ko bhī sarāhā jā.egā
jab tirā rañg-e-suḳhan hogā hazāroñ se judā

is fasl-e-nau-bahār meñ be-bāda-e-ġhurūr
har bul-havas hai rañg meñ tā.ūs kī namat

ab ke to nok-e-ḳhār bhī gul-rañg ho chalī
kal dekhnā ki dasht bhī gulzār ho ga.e

kisī ke aam se chehre ko bhūlne ke liye
hazār rañg ke sapne mujhe dikhā.e ga.e

kuchh to vafā kā rañg ho dast-e-jafā ke saath
surḳhī mire lahū kī milā lo hinā ke saath

dil ke asrār chhupāte haiñ vo ham se 'shā.ir'
ham ki rañg-e-lab-o-ruḳhsār samajh lete haiñ

mujh se tasvīr talab kartī haiñ merī āñkheñ
maiñ ne kuchh rañg chune the tire shīrāze se

'hinā' pe rañg-e-ibādat faqat ḳhudā kā rahā
vo sajda-rez munavvar-jabīn huuñ ḳhush huuñ

surḳhī-e-ḳhūn-e-tamannā ābrū-e-ishq hai
ārzūoñ kā lahū rañg-e-bayāñ hone to do

ḳhāna-e-be-rañg bhī hai shīsha-e-sad-rañg bhī
dil ko pahle be-niyāz-e-īn-o-āñ hone to do

ye barq-o-sharar ye shams-o-qamar dete haiñ nishān-e-manzil kyā
ai dost hameñ ho saktā hai andāza-e-rañg-e-mahfil kyā

rañg jazbāt meñ bhar jaane ko jī chāhtā hai
kaam ik pyārā sā kar jaane ko jī chāhtā hai

ek tasvīr kī takmīl ke ham do pahlū
rañg bhartā huā tū rañg banātā huā maiñ

taras na jaa.eñ kahīñ rañg-o-bū ko ahl-e-chaman
guloñ ko dekh ke zaḳhm-e-jigar kī baat na kar