Tags-Rang

rañg rañgīlī holī
chhail chhabelī holī

hamāre josh-e-vahshat ne ye ham ko rañg dikhlāyā
na kuchh taqsīr laḌkoñ kī na kuchh taqsīr patthar kī

ai ḳhayāl kī kaliyo aur muskurā letīñ
kuchh abhī to aayā thā rañg sā tabassum kā

ye tirī sāda-lauhiyāñ nāseh rañg kisī din lā ke raheñgī
ḳhuub banegī terī hajāmat mil ga.e gar hajjām munāsib

saare alfāz ġhazal jaise the guftār ke vaqt
rañg-e-iz.hār-e-tamannā bhī ġhazal jaisā thā

ai inqalāb-e-rañg tabī.at sambhālnā
ham bhī uThe haiñ bazm se ab ke hazīñ bahut

tum ko dikhlā.eñge dil kī tasvīr
jā-ba-jā rañg abhī bharnā hai

ḳhūn-e-ushshāq se jaam bharne lage dil sulagne lage daaġh jalne lage
mahfil-e-dard phir rañg par aa ga.ī phir shab-e-ārzū par nikhār aa gayā

rut badalne lagī rañg-e-dil dekhnā rañg-e-gulshan se ab haal khultā nahīñ
zaḳhm chhalkā koī yā koī gul khilā ashk umDe ki abr-e-bahār aa gayā

vo rañg vo āvāz vo saj aur vo sūrat
sach kahte ho tum pyaar ke qābil to vahī hai

ġhazloñ meñ sau rañg milā kar apnā rañg ubhārā thā
ustādoñ ke saa.e meñ kuchh apnī raah banāte the

qadr-e-suḳhan ham kyā jāneñ haañ rañg-e-suḳhan kuchh aisā thā
achchhe achchhe kahne vaale apne paas biThāte the

hazār rañg the lekin thā ek hī jalva
kamāl husn kā tere javāb ho na sakā

ye rañg-o-bū ye nazāre ye bazm-ārā.ī
niyāz-o-nāz-o-adā husn ishq ra.anā.ī

saaqī bahār dar-kaf phuul aa.e mai-kade se
tūfān uTh rahā hai gulshan meñ rañg-o-bū kā

dard-o-rāhat vasl-o-furqat ishq ke haiñ rañg-o-rūp
jaate jaate us ne 'zākir' ḳhuub samjhāyā hameñ

terī fitrat jo darindoñ sī nazar aatī hai
kaun sā rañg kiyā ḳhuun meñ shāmil tū ne

chhup chale haiñ ḳhat-e-shab-rañg se ruḳhsār-e-sabīh
din hai kam shaam ke āsār ayaañ saare haiñ

surḳh phūloñ kā nahīñ zard udāsī kā sahī
rañg kuchh to mirī tasvīr meñ bhartā jaa.e

bazm ko rañg-e-suḳhan maiñ ne diyā hai 'aḳhgar'
log chup chup the mirī tarz-e-navā se pahle