Tags-Rang

zindagī merī tamannāoñ mire ḳhvāboñ kā ruup
phuul maiñ huuñ rañg maiñ huuñ abr maiñ barsāt maiñ

kaise kaise rañg haiñ tanhā.ī kī tasvīr meñ
jab kabhī fursat mile tab aa.ine meñ dekhnā

ek to shaam rañg rañg phir mire ḳhvāb rañg rañg
aag sī hai lagī huī mere paroñ ke darmiyāñ

nahīñ ab to ahl-e-junūñ meñ bhī vo jo shauq-e-shahr meñ aam thā
vo jo rañg thā kabhī kū-ba-kū sar-e-kū-e-yār bhī ab nahīñ

ḳhud us kā rañg pīchhā kar rahe haiñ
kahīñ dekhī hai aisī sādgī kyā

rahī nahīñ kabhī yak-rañg āsmāñ kī jabīñ
hurūf-e-lauh-e-muqaddar badalte rahte haiñ

butān-e-rañg bhī kuchh kam nahīñ hayūloñ se
qadam qadam pe ye paikar badalte rahte haiñ

bisāt-e-shauq ke manzar badalte rahte haiñ
havā ke rañg barābar badalte rahte haiñ

ye zindagī badalte mausamoñ kā rañg-rūp hai
kabhī bahār kā samāñ kabhī ḳhizāñ liye hue

vahāñ kī sub.hoñ kā rañg hai fāḳhtāoñ jaisā
hameshgī ke nishān saare haiñ us kināre

ham se 'shā.ir' bhī ho ga.e āḳhir
rañg-e-hālāt dekh kar ḳhāmosh

phir kisī ke sāmne chashm-e-tamannā jhuk ga.ī
shauq kī shoḳhī meñ rañg-e-ehtarām aa hī gayā

Dhañg badalte jā.eñge rañg machalte ā.eñge
laġhzish-e-pā kī tarz meñ rañg-e-hinā ke saath saath

ahd-e-vafā subuk-havā rañg-e-vafā ke saath saath
rūh-e-suḳhan badal ga.ī tarz-e-adā ke saath saath

dil meñ khīñch ke us kī sūrat aaj to ḳhush ḳhush aa.e ho
kal se us meñ rañg bharoge kal se naqsh ubhāroge

sīrat na ho to āriz-o-ruḳhsār sab ġhalat
ḳhushbū uḌī to phuul faqat rañg rah gayā

hujūm-e-sarv-o-saman hai na sail-e-nik.hat-o-rañg
vo qāmateñ bhī ga.iiñ vo qayāmateñ bhī ga.iiñ

ḳhair thī ulfat meñ dil ne rañg kuchh badlā na thā
ab tamāsha dekhiyegā vo bhī dīvāna huā

vahī ek manzar-e-ḳhush-adā kahīñ naqsh meñ kahīñ rañg meñ
vahī us kī zulf ġhazal-numā vahī us kā chehra kitāb sā

bād-e-fanā bhī hai maraz-e-ishq kā asar
dekho ki rañg zard hai mere ġhubār kā