Tags-Rang

shāhid-e-mast ne sarmast kiyā hai 'sāqī'
ham vo mad.hosh hue rañg-e-suḳhan bhuul gayā

chashm-e-bad-dūr aish-e-ahd-e-shabāb
sub.h ham-rañg-e-shām rakhte haiñ

ummīd jā ke nahīñ us galī se aane kī
ba-rañg-e-umr mirā nāma-bar ravāna huā

dāġh-e-dāman ko chhupā.e hue phirtī hai havā
rang-o-āhang se badlā huā shīsha dekhā

rañg badlā huā thā phūloñ kā
tum yaqīnan udaas guzre the

mire nasīb ke ḳhush-rañg ḳhvāb aur sarāb
na is jahān meñ the aur na us jahān meñ haiñ

dhundlā sā zard maazī kā ho jis tarah varaq
kitnā hasīn aap kā rañg-e-libās hai

ek hī rañg kā ġham-ḳhāna-e-duniyā niklā
ġham-e-jānāñ bhī ġham-e-zīst kā saayā niklā

jahāñ har siñgār fuzūl hoñ jahāñ ugte sirf babūl hoñ
jahāñ zard rañg ho ghaas kā vahāñ kyuuñ na shak ho bahār par

havā kā rañg Dhañg hī kuchh aur hai
duā karo ki āshiyāñ kī ḳhair ho

ab dekhte haiñ kaun uḌātā hai rañg-o-bū
apnā lahū sharīk-e-bahārāñ kareñge ham

phūloñ kā dil kalī kī tamannā mirī duā
kaam aa.e rañg ban ke tumhāre jamāl meñ

na vo shān-e-jabr-e-shabāb hai na vo rañg-e-qahr-e-itāb hai
dil-e-be-qarār pe in dinoñ hai sitam yahī ki sitam nahīñ

ham shā.er-e-hayāt haiñ ham shā.er-e-hayāt!
'daurāñ' vo surḳh rañg kā parcham to do hameñ

jis ko dekhā aap hī aayā nazar
rañg ab 'kaifī' ye apnā ho gayā

kaisī āzādī asīrī chiiz kyā
jab fanā rañg-e-tamannā ho gayā

titliyāñ rañg chuntī rahtī haiñ
aur maiñ ḳhushbuoñ kī kaan meñ huuñ

soch rahā huuñ kis ke vish se hogī kam taklīf
chāroñ aur khaḌe haiñ mere rañg-birañge naag

rashk-e-sahrā hai ghar kī vīrānī
yahī rañg-e-bahār hai apnā

kyā hujūm-e-rañg 'aḳhtar' kyā faroġh-e-bu-e-gul
mausamoñ ke zā.iqe būḌhe shajar meñ rah ga.e