Tags-Rang

kisī kī khoī huī yaad ke ishāre par
maiñ rañg DhūñDne niklā huuñ us sitāre par

safā-e-hairat-e-ā.īna hai sāmān-e-zang āḳhir
taġhayyur āb-e-bar-jā-māñda kā paatā hai rañg āḳhir

na vo hogā na ham lekin ye duniyā
harīs-e-rañg-o-bū hotī rahegī

ai māh-e-she.r-parvar o mehr-e-suḳhan-varī
ai āb-o-rañg-e-'hāfiz' o ai husn-e-'anvarī'

chehre ko rañg-o-nūr kā tūfāñ kiye hue
sham-o-sharāb-o-sh.er kā unvāñ kiye hue

har taraf phuul khile rañg ke bādal barse
ai 'suhail' us kī nigāhoñ ne sajāyā sāvan

fikr ke sahn meñ ma.asūm ġhazal kī titlī
merā ḳhuuñ chuus ke ḳhush-rañg huī hai is baar

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

kār-zār-e-ishq meñ aane ke ba.ad
rañg-e-mīrās-e-ab-o-jad khul gayā

gulābī gaal par kuchh rañg mujh ko bhī jamāne do
manāne do mujhe bhī jān-e-man tyauhār holī meñ

āshob-e-ḳhisht-o-ḳhāk se jī ko amaañ kahāñ
phir us pe rañg-e-shīsha-e-pindār dekhnā

'bebāk' ruḳh pe chhāne lage haiñ ḳhizāñ ke rañg
go hāsil-e-bahār to tū bhī hai maiñ bhī huuñ

shab ke chehre meñ koī rañg to bhar jā.ūñgā
chal paḌā huuñ to maiñ ab tā-ba-sahar jā.ūñgā

jo ġhinā ke suut se ho banā jo razā kī suuī se ho silā
jo rañgā ho shukr ke rañg se mujhe shauq aise libās kā

us aañkh meñ koī be-rañg sī kashish thī 'riyāz'
purāne qiloñ meñ kunda ibāratoñ kī tarah

harīm-e-bā-asar tilism-e-rañg-o-bū
bahisht-e-be-karāñ dhuāñ dhuāñ dhuāñ

koī mahrūm-e-mohabbat na rahā mere ba.ad
rañg laa.ī mirī tāsīr-e-duā mere ba.ad

kalī pe rañg guloñ par nikhār bhī to nahīñ
bahār ḳhaak umīd-e-bahār bhī to nahīñ

yahāñ bhī dil pe udāsī kā chhā rahā hai dhuāñ
ye rañg o nuur kī bastī hai kyā kahā jaa.e

tū rañg hai ġhubār haiñ terī galī ke log
to phuul hai sharār haiñ terī galī ke log