Tags-Rang

shaam aate hī utar aa.e mire gaañv meñ rañg
jis ke ye rañg the jaane vo qabā kis kī thī

harī vaadī kā afsūñ TūTtā hai
ḳhizāñ kuchh rañg vo dikhlā rahī hai

har qadam par rāstoñ ke rañg the bikhre hue
chalne vāloñ ke liye apnā safar paiġhām thā

darūn-e-dil ḳhalish aisī khulī thī
ki jis kā rañg chehre par uḌā thā

kis kī āñkheñ tohmat-e-lams uThāeñgī
bijlī ke tan meñ haiñ kis ke rañg bhare

rañg-e-libās ko rañg-e-badan se aab mile
guñg hurūf meñ naġhmoñ kā āhañg bhare

rag rag ek tasavvur ek umañg bhare
ik ḳhushbū phūloñ meñ kyā kyā rañg bhare

pole pole paañv dhare purvā.ī bhī
ḳhaak meñ uḌte rañg ye kis ke sañg bhare

vaqt kī sāzish gahrī hotī jaatī hai
dīvāroñ ke rañg utarte jaate haiñ

rafta rafta rañg bikharte jaate haiñ
tasvīroñ ke daaġh ubharte jaate haiñ

hijr ehsās ko shal bhī to kiye rahtā hai
asar us kā koī bā-rañg-e-digar chāhtā thā

dikhā.ī dene lagā ruḳh pe rañg-e-bātin bhī
bahut qarīb haiñ ham thoḌā fāsla kar leñ

duniyā ke rañg anokhe haiñ
jo mere sāmne rahtā hai us ke ghar meñ ghar-vālī hai

jis kī is ālam-e-sūrat meñ hai rañg-āmezī
usī tasvīr kā ḳhāka to ye insān bhī hai

rañg ḳhāke meñ nayā bhar dūñgā maiñ
dushmanoñ se dostī kar lūñgā maiñ

jaanā dekh aanā kuchh rañg abhī bahtā hogā
shahr ke chaurāhe meñ kal ik ḳhvāb huā qurbān

usī huur kī rañgat uḌī rone se hamāre
rañg-e-gul-e-firdaus bhī kachchā nazar aayā

zindagī ke dāman meñ rañg-o-nūr-o-nik.hat kyā
ḳhvāb hī to dekhā hai ḳhvāb kī haqīqat kyā

ab ḳhair se un kī bazm kā itnā rañg to badlā mere ba.ad
jab naam mirā aa jaatā hai kuchh zikr-e-vafā ho jaatā hai

sāġhar-e-bāda-e-gul-rañg to kuchh duur nahīñ
nigah-e-pīr-e-ḳharābāt se Dar lagtā hai