Tags-Rang

majlis se apnī gul ko bhijvā de phir chaman meñ
kis vāste ki us kā vo rañg-o-bū nahīñ yaañ

maiñ ne maañ kā libās jab pahnā
mujh ko titlī ne apne rañg diye

rañgoñ meñ vahī to rañg niklā
jo terī nazar meñ jach gayā ho

ḳhvāb kī sūrat kabhī ham-rañg afsāna mile
chāñd jaise log ham se māhtābāna mile

merā dil taakā gayā jaur o jafā ke vāste
jab ki puure rañg par un kī javānī ho chukī

koī ḳhabar thī us kī parindoñ ke shor meñ
rañg-e-havā meñ shāḳh-o-shajar intizār thā

ye shauq-o-ram kī bhūl-bhulayyāñ ajiib hai
nairañg-e-rañg hai haram-e-dil-kushā-e-qalb

kis rañg meñ bayān kareñ mājrā-e-qalb
dekhā jo ham ne jalva-e-hairat-fazā-e-qalb

añgḌā.ī le rahī thī gulistāñ meñ jab bahār
har phuul apne rañg kī ātish meñ jal gayā

umr bitā dī apnoñ aur ġhairoñ ke naqsh banāne meñ
jab apnī tasvīr banānā chāhī phīke paḌ ga.e rañg

kis kāran itne rañgoñ se yaarī kis kāran ye Dhañg
jitne rañg bhī chāho ziist meñ bhar lo maut kā ek hī rañg

sāhiloñ par aur bhī ḳhush-zauq the lekin mujhe
pāniyoñ ke rañg har mauj-e-balā tak le ga.e

'asad' har jā suḳhan ne tarh-e-bāġh-e-tāza Daalī hai
mujhe rañg-e-bahār-ījādi-e-be-dil-pasand aayā

kaf-e-ḳhayāl pe aks-e-nashāt-e-rañg tirā
nahīñ banāne kā yaarā magar banāte haiñ

ḳhushbū vahī hai rañg vahī hai aaj vafā ke phūloñ kā
aap kyā aa.e phir se chaman meñ din vo purāne lagte haiñ

pāgal panchhī ba.ad meñ chahke pahle maiñ ne dekhā thā
us jampar kī shiknoñ meñ halkā sā rañg bahārāñ kā

jalne vāloñ ne bhī shahnāz-e-ġhazal se 'kausar'
husn-e-fan maañg liyā rañg-e-suḳhan maañg liyā

manzar meñ ghul ga.e haiñ dhanak ke tamām rañg
be-rañg ā.īne se vo lamha guzar gayā

maiñ siyah-baḳht aur raqīb-e-rū-siyāh ham-rañg haiñ
qiir tere paas aur mushk-e-ḳhutan donoñ haiñ ek

rañg laa.ī hai mirī zaat se ġhaflat merī
mere andar mutazalzal hai hukūmat merī