Tags-Rang

haath meñ sab ke jild thī jis ke ajiib rañg the
jis pe ajiib naam the aur koī varaq na thā

dukhī huī mirī āñkheñ thī tere ashkoñ se
ki rañg halkā paḌā thā kisī chamelī kā

chhupoge kyā digar rañg-e-shabistāñ kar diyā ham ne
ki apne ghar ko phūñkā aur charāġhāñ kar diyā ham ne

dekhtī āñkhoñ se ham chup-chāp sunte hī rahe
guftugū jaarī thī rañg-e-gul pe nā-bīnāoñ meñ

kyā jāniye zālim ne kise qatl kiyā hai
kyuuñ hāthoñ meñ aaj us ke huā rañg-e-hinā tez

vaqt ke tasalsul meñ ham ba-rañg-e-sho.ala the
umr-e-yak-nafas meñ bhī raushnī the duniyā kī

phir jism ke manzar-nāme meñ so.e hue rañg na jaag uTTheñ
is ḳhauf se vo poshāk nahīñ bas ḳhvāb badaltā rahtā hai

paḌosiyoñ ne ġhalat rañg de diyā 'az.har'
vo chhat pe aayā thā mahtāb dekhne ke liye

maze meñ rañg meñ tezī meñ saaqī
mai-e-tasnīm kyā phīkī paḌī hai

ḳhaak uḌā.eñ ki na.e shahr basā.eñ yaaro
ham ba-har-rañg har ik shauq se bezār mile

ek hī dhartī se ham sab ne janm liyā hai sāthī
rañg-o-rūp isī dhartī se ham ne liyā hai sāthī

ham bhārat kī phulvārī ke rañg birañge phuul
ik duuje ko kāñTā samjheñ ye hai apnī bhuul

rañg-o-rūp alag alag hai phir bhī ek hai jīvan
alag alag hai apnī kyārī phir bhī ek hai jīvan

guloñ ke rañg ko kyā dekhte ho ai ḳhūbāñ
ye rañgateñ haiñ tumhāre hī pairahan kī sī

phuul kuchh is tarah khilā dil bhī zarā sā kaT gayā
thoḌā sā rañg ḳhuun kā rañg-e-bahār meñ milā

rañg ḳhushiyoñ ke kal badalte hī
ġham ne thāmā mujhe phisalte hī

shahr hai chehroñ kī tamsīl
sab kā rañg utarnā hai

apne gumāñ kā rañg thā maiñ
ab ye rañg bikharnā hai

us ke hāthoñ pe haiñ mere ḳhuuñ ke nishāñ
jo mahakte haiñ rañg-e-hinā kī tarah

rañg ye un kī sabāhat ne ajab dikhlāyā
surḳh joḌe pe gumāñ hotā hai bādāmī hai