Tags-Rang

chaman pe rañg aatā hī nahīñ thā
tirī poshāk se laayā gayā hai

mujhe fikr thī mirī zaat par koī rañg bhī na chaḌhe magar
vo kamāl-e-ġhairat-e-ā.ina mirā aks mujh ko dikhā gayā

mubārak bādiya-gardo bahār aa.ī bayābāñ meñ
numūd-e-rañg-e-gul hai har sar-e-ḳhār-e-muġhīlāñ meñ

karne lage qayās kahīñ qatl ho gayā
āñdhī kā rañg surḳh thā sab log Dar ga.e

is baar nazar ke āñgan meñ jo phuul khilā ḳhush-rañg lagā
is baar basārat ke dil meñ nādīda basīrat jaagī hai

huuñ rang-e-mohabbat se vāqif huuñ soz-e-mohabbat se vāqif
gulzār meñ bulbul maiñ thā kabhī mahfil meñ kabhī parvāna thā

hamīñ the jān-e-bahārāñ hamīñ the rañg-e-tarab
hamīñ haiñ bazm-e-mai-o-gul meñ aaj mohr-ba-lab

bīmār mausamoñ kā mudāvā muhāl hai
ā.ankhoñ meñ laakh rañg sajātā rahe koī

jo samajhnā chāhiye thā vo kahāñ samjhā thā maiñ
is jahān-e-rañg-o-bū ko ḳhāk-dāñ samjhā thā maiñ

tā.ir-e-rañg-e-hinā huuñ to lagūñ tere haath
chuTkiyoñ meñ tū abas yaar uḌātā hai mujhe

husn nairañgī-e-ālam kā ajab rañg se kuchh
ain nairañgī meñ sau rañg dikhātā hai mujhe

haañ jehl tumheñ se rañg laayā phir kyuuñ
laayā to gilā zabāñ par aayā phir kyuuñ

kiyā ġhārat mohabbat kī faqat ek tez bārish ne
utar kar dil se sab rañg-e-tamannā duur tak aayā

rañg-e-hinā pe tohmat us lāla-rū ne bāñdhī
hāthoñ meñ mal ke aayā ḳhuuñ dil-tapīdgāñ kā

dil ko kis bū-qalamoñ jalve ne hai ḳhuun kiyā
ashk ā.ankhoñ se jo ye rañg-ba-rañg aate haiñ

ek din chhin jā.egā āñkhoñ se saarā rañg-o-nūr
dekh lo un ko ki ye manzar hameshā.ī nahīñ

tilā.ī rañg jānāñ kā agar mazmūn likhūñ ḳhat meñ
to haala gird harfoñ ke bane sone ke paanī kā

ye kaisā rañg nazar aayā us kī āñkhoñ meñ
ki saare rañg badalte dikhā.ī dete haiñ

jahāñ rañg-o-bū hai aur maiñ huuñ
bahār-e-ārzū hai aur maiñ huuñ

kyā patā kis jurm kī kis ko sazā detā huuñ maiñ
rañg sā ik bāñdhtā huuñ phir bhulā detā huuñ maiñ