Tags-Rang

farq rañg-o-nasl kā thā mujh meñ tujh meñ is liye
haa.il us ko darmiyāñ honā hī thā so ho gayā

hamesha ḳhūn-e-shahīdāñ ke rañg se ābād
ye karbalā-e-muallā ye basra o baġhdād

bahāroñ kī hai aamad kā jinheñ da.avā vo batlā.eñ
chaman meñ aa.egī āḳhir bahār-e-rañg-o-bū kab tak

mahtāb kā kyā rañg kiyā dūd-e-fuġhāñ ne
ahvāl shab-e-tār se raushan hai hamārā

muqayyad rañg khilte hoñ kisī billor se jaise
khulā is tarah mere ḳhvāb par arzañg paanī kā

huā raushan dam-e-ḳhurshīd se phir rañg paanī kā
damak uTThā hai mere aa.ine par zañg paanī kā

uñgliyoñ ko ham qalam karte rahe
chāhatoñ meñ rañg bharne ke liye

ham haiñ nigoḌe ham haiñ bhagoḌe ham haiñ nikamme ham kāhil
jis dam mahfil rañg pe hogī ham se rahā na jā.egā

haath lagāte hī miTTī kā Dher hue
kaise kaise rañg bhare the ḳhvāboñ meñ

aañsū taare rañg gulāb sabhī pardes chale jaate haiñ
āḳhir āḳhir tanhā.ī hai kis ne kis kā saath diyā hai

kumhlāyā zarā rañg to vo soch meñ Duube
aahoñ se milā kartā hai kuchh sāñvalā-pan bhī

ḳhushbū kī dīvār ke pīchhe kaise kaise rañg jame haiñ
jab tak din kā sūraj aa.e us kā khoj lagāte rahnā

yaad rakkhe mujhe duniyā tirī tasvīr ke saath
rañg aise tirī tasvīr meñ bhar jā.ūñgā

shafaq kā rañg kitne vālehāna-pan se bikhrā hai
zamīñ o āsmāñ ne mil ke unvān-e-sahar likkhā

subuk se rañg halke dā.ere ubhre hue shoshe
kisī ne kitnī fankārī se is ke jism par likkhā

uḌtī hai ġham liye paroñ par jo
kaisī ḳhush-rañg sī vo titlī hai

rañg vo hī bharegī donoñ meñ
apnī yādoñ kī vo jo titlī hai

ye kyā ho gayā tere maktūb meñ
ta.alluq kā rañg-e-nigārish nahīñ

koī bāñdho na bāñdhe ab kuchh na hogā
ki ham rañg apnā jamā.e hue haiñ

dūrī-e-rañg-o-bū hazār sahī
hijr paiġhām-bar bhī hotā hai