Tags-Rang

rañg-e-mahfil chāhtā hai ik mukammal inqalāb
chand sham.oñ ke bhaḌakne se sahar hotī nahīñ

sub.h-e-ālām kā chehra nahīñ dekhā jaatā
ḳhvāb-e-ḳhush-rañg se bedār hue haiñ ham log

hinā kā rañg ye hargiz nahīñ hai sach batā zālim
ye kis kā phuul sā dil tū ne paañv se masal Daalā

ek hī zardī kyuuñ mausam par chhā.ī hai
sātoñ rañg palaT kar kyuuñ nahīñ aate haiñ

aur kuchh roz ruke sust lahū kā mausam
aur kuchh der yahī rañg-e-ḳhizāñ rah jaa.e

'farhat' tire naġhmoñ kī vo shohrat hai jahāñ meñ
vallāh tirā rañg-e-suḳhan yaad rahegā

tamām rañg hai ḳhushbū tamām ḳhushbū rañg
guloñ se rañg uḌā leñ to baas bhī na rahe

vaañ ki aariz surḳh thā rañg-e-tilā-e-nāb se
yaañ vufūr-e-ashk se mizhgāñ mirā sīmāb thā

vo aa.e yā na aa.e mulāqāt ho na ho
rañg-e-sahar ke paas ḳhirām-e-sabā to hai

lālach batā ke duur se vaa.iz kā rañg dekh
ḳhālī hī kyuuñ na ho koī botal uThā to lā

mirī virāsat meñ jo bhī kuchh hai vo sab isī dahr ke liye hai
ye rañg ik ḳhvāb ke liye hai ye aag ik shahr ke liye hai

kyā zulm hai ki tū hai asiir aur baaġh meñ
kaliyāñ nikāltī haiñ na.e rañg andalīb

nasl qaumiyyat kalīsā saltanat tahzīb-o-rañg
rauñd chuktī hai jab in sab ko javānī kī umañg

tafraqa paḌtā hai jab duniyā meñ nasl-o-rañg kā
le ke maiñ aatī huuñ parcham inqilāb-o-jañg kā

kitne ḳhvāboñ meñ rañg us ke haiñ
kitnī āñkhoñ se dekhtā hai ab

vo kaun hai use sūraj kahūñ ki rañg kahūñ
karūñgā zikr to ḳhushbū zabāñ se aa.egī

zarā hī der meñ kyā jaane kyā ho raat kā rañg
so ab qayām sar-e-rahguzar nahīñ karnā

tujh se bichhḌe haiñ to ab kis se milātī hai hameñ
zindagī dekhiye kyā rañg dikhātī hai hameñ

lab-e-nāzuk ke bose luuñ to missī muñh banātī hai
kaf-e-pā ko agar chūmūñ to mehñdī rañg laatī hai

tumhāre binā sab adhūre haiñ jānāñ
sabā phuul ḳhush-bū chaman raushnī rañg