Tags-Rang

karishme haiñ ki naqqāsh-e-azal nairañgiyāñ terī
jahāñ meñ mā.il-e-rañg-e-fanā har naqsh-e-hastī hai

jaane kis rañg meñ tafsīr kareñ ahl-e-havas
mad.h-e-zulf-o-lab-o-ruḳhsār karūñ yā na karūñ

rañg-e-nigah-e-shauq bhare kaun chaman meñ
tinke bhī to 'yāqūb' nasheman meñ nahīñ haiñ

dekhī thī ik jhalak ki uḌe rañg har taraf
koī pukārtā hī rahā aur dekh le

yuuñ kis tarah batā.ūñ ki kyā mere paas hai
tū bhī to koī rañg dikhā aur dekh le

us ko ḳhabar huī to badal jā.egā vo rañg
ehsās tak na us ko dilā aur dekh le

maiñ aisā ḳhūb-sūrat rañg huuñ dīvār kā apnī
agar niklā to ghar vāloñ kī nādānī se niklūñgā

ai sanam terī karanjī aañkh se sābit huā
rañg uḌ jaatā hai rū-e-mardum-e-bīmār kā

ab bhī pahle kī tarah pesh-rav-e-rañg-o-sadā
ek muñh-band sī be-rañg kalī aatī hai

mire badan ko lahū-rañg pairahan bhī de
mirī qabā se mire zaḳhm bhī chhupā.e vo

nuur se mire ishq ke nikhre the is ke ḳhadd-o-ḳhāl
rañg thā mire ḳhvāb kā aks jamāl-e-yār meñ

shauq kā rañg bujh gayā yaad ke zaḳhm bhar ga.e
kyā mirī fasl ho chukī kyā mire din guzar ga.e

ye ajab rañg-e-mizāj hai magar ab yahī mujhe raas hai
kabhī DhūñDhtā huuñ maiñ ḳhud ko bhī kabhī ik jahāñ mire saath hai

sūraj apnī pichkārī se kartā hai yalġhār
sub.h ke ujle dāman pe hai rañgā-rañg bahār

sar pe sūraj hai to phir chhāñv se mahzūz na ho
dhuup kā rañg bhī dīvār meñ aa saktā hai

āzār-e-dil se rañg-e-tabī.at badal gayā
āḳhir dimāġh fikr-e-musalsal se chal gayā

hazār rañg meñ pinhāñ hai ārzū-e-hayāt
duā-e-nīm-shabī tā junūn-e-koh-kanī

jamāl-e-nastaranī rañg-o-bū-e-yāsmanī
guloñ ne siikh liyā tum se zauq-e-pairahanī

lahū kī aag thī raushan har ik hathelī par
kisī bhī haath pe rañg-e-hinā kahīñ na milā

sirf āñkhoñ kī tasallī ke liye hai ye sair
rañg lete haiñ na ham phuul se bū lete haiñ