Tags-Rang

rañg pakkā ho chalā thā yaad aatā hai magar
dhuup mere jism par tab Thiik se bhīgī na thī

inhīñ gul-rañg darīchoñ se sahar jhāñkegī
kyuuñ na khilte hue zaḳhmoñ ko duā dī jaa.e

kamāl-e-husn hai husn-e-kamāl se bāhar
azal kā rañg hai jaise misāl se bāhar

ajiib silsila-e-rañg hai tamannā bhī
had-e-urūj se aage zavāl hai bāhar

peḌoñ meñ chhāñv phuul meñ ḳhushbū hai apnā rañg
vīrānī baḌh ga.ī hai ki bastī nahīñ rahī

rañg hai raushnī hai mūrat hai
tū mire ḳhvāb kī haqīqat hai

ho gayā shāmil ġharaz kā rañg mauj-e-ishq meñ
jhiil ke nithre hue paanī meñ gaarā mil gayā

phuul haiñ rañg haiñ bahāreñ haiñ
zindagī kitnī ḳhūbsūrat hai

ek tasvīr banā.ī thī mukammal na huī
ek hī rañg lahū rañg thā bhartā gayā maiñ

āsmāñ kartā hai jo chashm-e-ināyat apnī
rañg patjhaḌ ke bahāroñ meñ badal jaate haiñ

kyā kaam chale kyā rañg jame kyā baat bane kaun us kī sune
hai 'akbar'-e-bekas ek taraf aur saarī ḳhudā.ī ek taraf

jise talāsh hai ḳhush-rañg ābshāroñ kī
vo zaḳhm zaḳhm badan le ke ghar bhī aatā hai

dūriyoñ ne miTā diye jo bhī the qurbatoñ ke rañj
ab mirī baat baat meñ rañg tirī talab kā hai

rakh qadam mujh dīda-e-ḳhūñ-bār par
gar tujhe rañg-e-hinā darkār hai

maiñ ik nizām-e-kohan ke narġhe meñ saañs le kar bhī sochtā huuñ
ki sub.h kaise tulūa hogī ki shaam kis rañg meñ Dhalegī

jo rañg mujh meñ sañvar rahe the vo shaam hote hī kho ga.e haiñ
jo sham.a mere vajūd meñ jal rahī hai kis sub.h tak jalegī

nayā nahīñ hai mujhe marg-e-nā-gahāñ kā payām
hazār rañg se apnī mujhe ḳhabar aa.ī

qaus-e-quzah ke rañg mayassar nahīñ to phir
dariyā kī mauj mauj meñ baT kar kalām kar

huā hai ishq meñ ḳhāsān-e-haq kā rañg safed
ye qatl-e-ām nahīñ shoḳhi-e-hinā kahiye