Tags-Rang

dekh kar merā dasht-e-tanhā.ī
rañg-e-rū-e-bahār utrā hai

jo tū na aatā to rañg-e-fasurdagī ke sivā
mirī nigāh ko ye husn-e-shām kyā detā

mujh ko huā ye ḳhāk-nashīnī se fā.eda
thā dil ke aa.ine pe jo kuchh rañg uḌ gayā

taa.ir bhī yahāñ paidā haiñ kiye qudrat ne ajab gul-rañg-o-hāsīñ
gar zamzame un kī raushnī sun leñ yaad aa.e unhīñ firdaus-e-barīñ

sabz hai pairahan chāñd kā aaj phir
rañg-e-rukHsār hai surḳh sā aaj phir

haiñ rañg-ba-rañg ke phuul khile zīnat hai chaman ke shabāb un kā
kholā hai nasīm-e-sahar ne abhī kis shaan se band naqāb un kā

badan-e-yār ye sab rañg tire apne haiñ
yā kisī dast-e-mohabbat ke lagā.e hue haiñ

jamānā rañg is duniyā se sīkhe
ki hai to kuchh nahīñ bantī bahut hai

har ik jhoñkā nukīlā ho gayā hai
fazā kā rañg niilā ho gayā hai

ik ḳhvāb thā jo mujh se bayāñ ho nahīñ sakā
ik rañg thā jo dhuup se Takrā ke mar gayā

ab vo nahīñ hai jalva-e-sham-o-sahar kā rañg
terā jamāl shāmil-e-husn-e-nazar nahīñ

un kī jo mayassar nahīñ shādāb-nigāhī
phūloñ meñ koī rañg na sabze meñ tarī hai

maiñ bhī mirā raqīb bhī donoñ haiñ zaḳhm zaḳhm
donoñ lahūluhān haiñ ye hai anā kā rañg

parda ulaT ke us ne jo chehrā dikhā diyā
rañg-e-ruḳh-e-bahār-e-gulistāñ uḌā diyā

rañg apne aap hī ab sab ke sab zaa.il hue
hai abas dīvār par ye naqsh-o-paikar dekhnā

rang-o-āhang ke gul-daste meñ
phuul kyā saarā chaman laa.e haiñ

guzre bahut ustād magar rañg-e-asar meñ
be-misl hai 'hasrat' suḳhan-e-'mīr' abhī tak

na pūchho ishq ne ġhairat se kyā kyā rañg badlā hai
ḳhayāl aayā hai saath auroñ ke jab jab mushtarak terā

yak-tarfa mohabbat kā har rañg nirālā hai
begāna kare jag se ye rahmat-e-rusvā.ī

agar tabassum-e-ġhuncha kī baat uḌī thī yūñhī
hazār rañg meñ Duubī huī havā kyuuñ hai