Tags-Rang

hai havāsoñ pe shab-e-hijr kā is darja asar
sub.h ke rañg bhī kaale nazar aate haiñ mujhe

sab ek rañg meñ haiñ mai-kade ke ḳhurd o kalāñ
yahāñ tafāvut-e-pīr-o-javāñ nahīñ hotā

vasl ke rañg bhī badalte the
hijr bhī inqalāb jaisā hai

un āñkhoñ meñ rañg-e-mai nahīñ hai
kuchh aur hai ye vo shai nahīñ hai

nik.hat-o-rañg na mausam kī havā Thahrī hai
gul kī qismat meñ ba-har-hāl fanā Thahrī hai

jis meñ na koī rañg na āhañg na ḳhushbū
tum aise gulistāñ ko jalā kyuuñ nahīñ dete

ḳhushbū-o-rañg āb-o-havā sāz-o-ḳhāmushī
kyā qāfile haiñ dasht-e-ḳhalā meñ ruke hue

maqsūd hai qaid-e-justujū se bāhar
vo gul hai dalīl-e-rañg-o-bū se bāhar

ajiib rañg ye bastī hai us kī nagrī bhī
har ek nahr ko dekhā furāt hone tak

nargis jo gulistāñ meñ hai to dasht meñ aahū
har rañg meñ dikhlāne lagī jalvagarī aañkh

jise hai faiz mirī ḳhānqāh se 'dānish'
vo kis tarah mirā rañg-e-suḳhan chhupā.egā

maiñ uḌ chaltā ba-rañg-e-saut-e-nāqūs
'vaqār' us but ne bulvāyā to hotā

bahār aa.ī ki din holī ke aa.e
guloñ meñ rañg khelā jā rahā hai

ujḌī huī har ravish chaman kī
detī hai surāġh rañg o bū kā

ye rañg dard ke aate nahīñ suḳhan meñ yūñhī
nihāl-e-dil pe mire zaḳhm hai khulā koī

niile niile rañg ke uupar baḌhtī hī jaatī hai safedī
ho ga.ī rañgat zar-o-qamar kī chauñk musāfir raat nahīñ hai

hai jahān-e-rañg-o-bū meñ husn jis kā intiḳhāb
us kā honā bazm meñ jalva-numā achchhā lagā

chāho jo tum na mujh se ḳhafā ho kabhī bahār
duniyā-e-rañg-o-bū pe tumheñ iḳhtiyār hai

mohabbat hai munj jiiv chaman kā so merā
prit phuul rañg rañg ke us kī nishānī

aaj kuchh rañg digar hai mire ghar kā 'ḳhālid'
sochtā huuñ ye tirī yaad hai yā ḳhud tū hai