Tags-Rang

kyā lams thā kyā zulf thī kyā surḳhī-e-lab thī
har rañg tirā jaise sharāboñ kī tarah thā

kis jhuTpuTe ke rañg ujāloñ meñ aa ga.e
TukḌe shafaq ke dhuup se gāloñ meñ aa ga.e

jaane kis rañg se rūThegī tabī.at us kī
jaane kis Dhañg se ab us ko manānā hogā

sūraj ko nikalne meñ zarā der hai 'ahmad'
phir zaat kā har rañg maiñ khone ke liye huuñ

hāthoñ meñ mire chāñd bhī lagtā hai khilaunā
ḳhvāboñ meñ falak rañg samone ke liye huuñ

imroz kī kashtī ko Dubone ke liye huuñ
kal aur kisī rañg meñ hone ke liye huuñ

kis tarah se dil-e-vahshī ko bhalā samjhā.ūñ
vo to har daam judā rañg judā chāhtā hai

har samt pā rahā huuñ vahī rañg-e-dil-fareb
hāthoñ meñ kufr ke mirā īmāñ hai kyā karūñ

ye tire lams kā karishma hai
phail jaatī huuñ rañg-o-bū ho kar

misāl-e-sub.h-e-bahār tū hai to maiñ huuñ shām-e-ḳhizāñ kī sūrat
chaman chaman ḳhār-o-ḳhas se mere faroġh hai tere rañg-o-bū kā

umaD ke aayā hai ai azīzo ravish ravish sail rañg-o-bū kā
magar na phir bhī nasīb chamkā agar mirī ḳhāk-e-be-numū kā

ghaTā diyā rutba har hasīñ kā miTā diyā rañg hūr-e-īñ kā
nahīñ hai ye chāñd chaudhvīñ kā shabāb kā mere mah-jabīñ kā

ik umr ḳhvāb meñ guzrī thī rañg bharte hue
khulī jab aañkh to manzar dhulā huā niklā

ruḳhsār par hai rañg-e-hayā kā faroġh aaj
bose kā naam maiñ ne liyā vo nikhar ga.e

tamām rañg adhūre lage tire aage
so tujh ko lafz meñ tasvīr kartā rahtā huuñ

apne jaisī koī tasvīr banānī thī mujhe
mire andar se sabhī rañg tumhāre nikle

maiñ huuñ shikār-e-fitna-e-ehsās-e-rañg 'shām'
kis tarah ek jism kī taqsīm ho ga.ī

kho.e haiñ us ke sehr meñ hī ahl-e-kārvāñ
us kī nazar jo vaqt-e-safar rañg bo ga.ī

phir vo havā chalī ki sabhī kuchh bikhar gayā
vo mahfileñ vo dost vo gul-rañg qahqahe

shaam kī gul-rañg havā kyā chalī
dard mahakne lagā jazbāt meñ