Tags-Rang

tirā naqsh utrā sar-e-varaq to tasarruf-e-lab-o-chashm se
bhare rañg maiñ ne kuchh is tarah ise shāhkār banā diyā

rañg mausam kā harā thā pahle
peḌ ye kitnā ghanā thā pahle

ye kyā ki rañg hāthoñ se apne chhuḌā.eñ ham
ilzām titliyoñ ke paroñ par lagā.eñ ham

koī nālāñ koī giryāñ koī bismil ho gayā
us ke uThte hī digar-gūñ rañg-e-mahfil ho gayā

mujhe kuchh tajrabe har rañg ke jholī meñ rakh chalnā
musāfir huuñ ġharaz kyā hai mujhe sahrā o gulshan se

vo hai rañg ḳhushbū dhanak chāñdnī
use zeb-o-zīnat kī hājat nahīñ

jalvoñ ke ḳhush-rañg parindoñ kī ḳhātir
āñkhoñ ko sayyād bhī karnā paḌtā hai

maslahat kā ye kafan rakhtā hai be-dāġh hameñ
ahl-e-īmān haiñ ham-rañg se Dar lagtā hai

na koī zauq-e-tamāshā na koī rañg-e-hayāt
zarūratoñ ke bahāne badal ga.ī koī shai

laal ho niilā ho nārañgī ho yā phir ho harā
rañg alag ḳhud-ġharzī ke par sab kā ik sā shor hai

rañg kitne haiñ tere chehre ke
kis havāle se tujh ko yaad kareñ

mahrūm-e-ḳhvāb dīda-e-hairāñ na thā kabhī
terā ye rañg ai shab-e-hijrāñ na thā kabhī

paas se yuuñ āñchal lahrāte log guzarte rahte haiñ
mere badan meñ qaus-e-quzah ke rañg utarte rahte haiñ

but-parastī tak pahuñchtī hai kahāñ nāseh ye baat
ḳhush huā kartā huuñ maiñ ḳhush-rañg patthar dekh kar

is ahd meñ rishtoñ kī be-rañg dukānoñ meñ
hiire se bhī mahñgā hai vishvās kā ā.īna

vo mirā sub.h-nafas muḳhlis-e-yak-rañg huā
ab na vo sub.h-e-muqarrar hai na shām-e-maḳhsūs

dāstān-e-shauq hai apne lahū se lāla-rañg
har zamāne meñ hamīñ unvān-e-afsāna rahe

rañg-e-shafaq kī dhuup khilī thī qadam qadam
maqtal meñ sub.h-o-shām kā manzar judā na thā

dāmān-e-chāk chaak guloñ ko bahāna thā
dil kā jo rañg thā vo nazar se chhupā na thā

maiñ bhī is safha-e-hastī pe ubhar saktā huuñ
rañg to tum mirī tasvīr meñ bhar kar dekho