Tags-Relationship

bas ek lamhā-e-benām kī giraft meñ haiñ
na jaane kaisā ta.alluq hai ye tumhārā mirā

baḌī ajiib ye majbūriyāñ samāj kī haiñ
munāfiqoñ se ta.alluq nibhānā paḌtā hai

ta.alluq tujh se rakh kar itnā samjhe
hamārī saañp se bhī dostī hai

tujh meñ aur mujh meñ ta.alluq hai vahī
hai jo rishta saaz aur mizrāb meñ

'farāz' tark-e-ta.alluq to ḳhair kyā hogā
yahī bahut hai ki kam kam milā karo us se

mushkil thā bahut mere liye tark-e-ta.alluq
ye kaam bhī tum ne mirā āsān kiyā hai

vo baat ki jo tark-e-ta.alluq kā sabab hai
vo baat hameñ aap batā kyoñ nahīñ dete

itnā hai zindagī kā ta.alluq ḳhushī ke saath
ek ajnabī ho jaise kisī ajnabī ke saath

aa ki TuuTe ta.alluq ko phir joḌ leñ
tere bas meñ bhī hai mere bas meñ bhī hai

bach ke nikle jo lā-ta.alluq the
bach nikalnā muhāl kis kā thā

phañse na qaid-e-ta.alluq meñ jo ki hai āzād
chaman meñ tā.ir-e-nik.hat asīr-e-dām nahīñ

ajnabī chehroñ meñ phir ik āshnā chehrā milā
phir mujhe us ke ta.alluq se patā apnā milā

khaa.e baiThā hai zamāne se ta.alluq kā fareb
tū 'alī' itnā to nādān nahīñ thā pahle

us ne jab toḌ diye saare ta.alluq mujh se
khīñch kar siine se phir maiñ ne bhī sāñseñ rakh diiñ

mirā nahīñ to vo apnā hī kuchh ḳhayāl kare
use kaho ki ta.alluq ko phir bahāl kare

mirā tumhārā ta.alluq bigaḌ ke ban gayā hai
mire tumhāre ḳhayālāt kā amiiñ koī hai

aisā bhī kahīñ tark-e-ta.alluq meñ huā hai
naama koī aayā na koī nāma-bar aayā

be-ta.alluq ruuh kā jab jism se rishta huā
ghar meñ lā-vāris pas-e-manzar kā sannāTā huā

ham se koī ta.alluq-e-ḳhātir to hai use
vo yaar bā-vafā na sahī bevafā to hai

ham kuchh bhī kaheñ lekin un se jo ek ta.alluq thā na rahā
rishte kī haqīqat kyā ma.anī bas TuuT gayā dhāgā hī to hai