Tags-Relationship

ye āḳhirī kañpkañpātā jumla ki is ta.alluq ko ḳhatm kar do
baḌe jatan se kahā hai us ne nahīñ kiyā to burā lagegā

ravābit sab hisār-e-hijr meñ haiñ
ta.alluq TūTtī zanjīr sā hai

maiñ apne aap meñ baiThā huuñ be-ḳhabar to nahīñ
nahīñ hai koī ta.alluq to apnī zaat se pūchh

tū reza reza ta.alluq se ghar banā 'shāhid'
magar ye dasht to dīvār-o-dar se zāhir hai

tum se shikva bhī nahīñ koī shikāyat bhī nahīñ
aur is tark-e-ta.alluq kī vazāhat bhī nahīñ

roz kā milnā girāñ-bār-e-ta.alluq na bane
be-sabab us se kabhī ḳhud ko judā bhī rakh le

ta.alluq TuuT jaane se mohabbat mar nahīñ jaatī
ye vo dariyā hai jis meñ bas ravānī hī ravānī hai

āġhāz-e-irtibāt-o-ta.alluq ke vāqi.āt
kuchh apne hosh kuchh mire dīvāna-pan se pūchh

ik ġham se hai ashkoñ ke ta.alluq kī vazāhat
maiñ ashk se patthar ko agar toḌ rahā huuñ

abhī tark-e-ta.alluq ke kisī barzaḳh meñ hai vo bhī
abhī mahfūz hai jo maiñ bhī aise faisle meñ huuñ

arz-e-bhopal se thā ta.alluq kabhī
ab to sab kuchh hai ye lāḌkāna mirā

vo ba.ad tark-e-ta.alluq kare hai yaad mujhe
use salīqa nahīñ bevafā nayā nayā hai

mire hone se ḳhud merā ta.alluq
ba-rañg-e-intihā rakkhā hai us ne

daf.atan tark-e-ta.alluq meñ bhī rusvā.ī hai
uljhe dāman ko chhuḌāte nahīñ jhaTkā de kar