Tags-Relationship

sā.at-e-tark-e-ta.alluq bhī qarīb aa hī ga.ī
kyā ye apnā sab ta.alluq rā.egāñ ho jā.egā

mohabbat ke liye tark-e-ta.alluq hī zarūrī ho
mohabbat meñ agar aisā maqām aayā to kyā hogā

ilāhī us ko mohabbat se kuchh ta.alluq hai
jo is tarah se sunātā hai naġhma-e-rañgīñ

bhulā paayā nahīñ maiñ daur-e-māzī ke hasīñ lamhe
kabhī tū yaad bhī kar le ta.alluq ye purāne se

us nī-vasl se ye tark-e-ta.alluq achchhā
chāñdī ko rakh ke maiñ ne sonā uThā liyā hai

ta.alluq āshiq o māshūq kā to lutf rakhtā thā
maze ab vo kahāñ baaqī rahe biivī miyāñ ho kar

ḳhayāl-e-tark-e-ta.alluq junūn-e-qat-e-marāsim
tamām sa.ī-e-talab hai tamām tishna-labī hai

be-ta.alluq hī sahī us ko magar hai mujh se
ik sarokār sarokār bhī aisā vaisā

ta.alluq ahl-e-jahāñ se ho gar to rakhiye bīm-o-rajā barābar
sivā ḳhudā ke kisī ke upar kabhī bharosa na kījiyegā

soḳhta lamhe tujhe bār-e-safar hī hoñge
raakh bhī apne ta.alluq kī uḌā de ab to

giraftārān-e-gesū par nahīñ kuchh munhasir nāseh
phañsā hai jo ta.alluq meñ use ārām kyā hogā

un kā kahnā hai ki bas tark-e-ta.alluq ho chukā
ham ye kahte haiñ ki ab tanhā rahe jaate haiñ ham

rabt-e-marāsim ke ba.ad tark-e-ta.alluq ġhalat
aag bujhāne se bhī hogā dhuāñ dosto

kyā milā faisla-e-tark-e-ta.alluq kar ke
tum jo bichhḌe the to hoñToñ pe duā kaisī thī

bachā kar dil guzartā jā rahā huuñ har ta.alluq se
kahāñ us aable ko taab hai ab choT sahne kī

buniyād-e-ta.alluq hai ik vahm-e-shanāsā.ī
socho to sabhī chehre anjān nikalte haiñ

sabza o gul mauj o dariyā anjum o ḳhurshīd o maah
ik ta.alluq sab se hai lekin raqībāna mujhe

us ne phir tark-e-ta.alluq kā bhī mauqa.a na diyā
ghaTte rishtoñ se ki har-chand ḳhabar-dār thā maiñ

ab tark-e-ta.alluq kā asar donoñ taraf hai
sharminda jo tū hai to pashemāñ hai 'pavan' bhī

ta.alluq kī na.ī ik rasm ab ījād karnā hai
na us ko bhūlnā hai aur na us ko yaad karnā hai