Tags-Rind

kyuuñ baat chhupā.ūñ riñd-e-mai-nosh huuñ meñ
duniyā kahtī ki dīn-farāmosh huuñ maiñ

'asad'-ullāh ḳhaañ tamām huā
ai dareġhā vo rind-e-shāhid-bāz

chhīn le sāqī-e-be-faiz ke hāthoñ se subū
riñd kyā aisā koī mahfil-e-rindāñ meñ nahīñ

vahīñ chashm-e-hūr phaḌak ga.ī abhī pī na thī ki bahak ga.ī
kabhī yak-ba-yak jo chhalak ga.ī kisī rind-e-mast ke jaam se

qadr mujh rind kī tujh ko nahīñ ai pīr-e-muġhāñ
tauba kar luuñ to kabhī mai-kada ābād na ho

merā darmāñ hai na ka.abe meñ na but-ḳhāne meñ
riñd huuñ mujh ko paḌā rahne do mai-ḳhāne meñ

maiñ vo riñd-e-nau nahīñ huuñ jo zarā sī pī ke bahkūñ
abhī aur aur saaqī ki maiñ phir sambhal rahā huuñ

har riñd-e-balā-kash par girtī hai sar-e-mahfil
barq-e-nigah-e-sāqī paimāna-ba-paimāna

mujh ko muaaf kījiye rind-e-ḳharāb jaan ke
āñkhoñ pe hoñT rakh diye jām-e-sharāb jaan ke

mujh riñd-e-bādah-kash ko ye jo ḳhauf-e-mohtasib
dil kī tarah chhupī huī botal baġhal meñ hai

badle dumbe ke kareñ riñd usī ko qurbān
īd-e-qurbāñ meñ jo sun paa.eñ bayān-e-vā.iz

apne ḳhvāboñ ke mai-kade meñ huuñ
riñd huuñ maiñ zarā nashe meñ huuñ

ḳhidmat meñ tirī nazr ko kyā laa.eñ ba-juz dil
ham rind to kauḌī nahīñ rakhte haiñ kafan ko

bazm-e-rindāñ meñ riñd bhī hai 'azīz'
pārsāoñ meñ pārsā bhī hai

reza reza hue mīnā-o-ayāġh
riñd-o-sāqī meñ Thanī ho jaise

jahāñ pe chhāyā sahāb-e-mastī baras rahī hai sharāb-e-mastī
ġhazab hai rañg-e-shabāb-e-mastī ki rind o zāhid bahak rahe haiñ

huā maiñ riñd-mashrab ḳhaak mar kar is tamannā meñ
namāz āḳhir paḌeñge vo kisī din to tayammum se

chheḌ vaa.iz har ghaḌī achchhī nahīñ
riñd bhī haiñ ek apne naam ke

mujh aise rind se rakhte zarūr hī ulfat
janāb-e-shaiḳh agar āshiq-e-ḳhudā hote

us riñd-e-siyah-mast kā īmān na pūchho
tishna ho to maḳhlūq hai pī le to ḳhudā hai