Tags-Rind

ye hai mai-kada yahāñ riñd haiñ yahāñ sab kā saaqī imaam hai
ye haram nahīñ hai ai shaiḳh jī yahāñ pārsā.ī harām hai

jo kuchh hai yahāñ vo hai ḳharābāt ke andar
kuchh bhī nahīñ ai riñd ḳharābāt se aage

pūchhte haiñ hazrat-e-zāhid se rind
daam kyā haiñ jāma-e-ehrām ke

jo tujh se kuchh bhī na milne pe ḳhush haiñ ai saaqī
kuchh aise rind bhī haiñ mai-kade meñ aa.e hue

ye ehtiyāt ne saaqī kī dil kā haal kiyā
ki riñd garmī-e-bazm-e-jahāñ se ruuTh ga.e

rind-e-ḳharāb-nosh kī be-adabī to dekhiye
niyyat-e-mai-kashī na kī haath meñ jaam le liyā

do ghūñT hī pī lete agar koī pilātā
ham rind-e-ḳhush-auqāt the saa.il to nahīñ the

riñd betāb haiñ ghanghor ghaTā chhā.ī hai
mai-kade guuñj rahe haiñ vo bahār aa.ī hai

qahr ik riñd pe qul pīr-e-muġhāñ ne thā paḌhā
sher ye ham ne sunā sunñe ko jab qul pahuñche

riñd-mashrab huuñ mujh ko kyā hove
maz.haboñ meñ jo iḳhtilāf huā

vaa.iz ne zikr-e-va.ada-e-firdaus kyuuñ kiyā
us rind se jo nashsha-e-vahdat se chuur thā

ik rahguzār manzil-e-mastī hai mai-kada
har riñd ko ḳhushī se sharīk-e-safar karo

koī mai de yā na de ham riñd-e-be-parvā haiñ aap
sāqiyā apnī baġhal meñ shīsha-e-sahbā haiñ aap

rind hote jo bā-shu.ūr 'anvar'
kyā batā.ūñ tumheñ vo kyā karte

kaun samjhegā in haqā.eq ko
'sho.ala'-e-riñd-e-pārsā ke sivā

riñd-mashrab haiñ kisī se hameñ kuchh kaam nahīñ
dair apnā hai na ka.aba na kalīsā apnā

log kahte haiñ ki hai zāhid-e-martāz 'riyāz'
riñd kahte haiñ use chor hai mai-ḳhāne kā

ye baat agar sach hai ki tum pīr-e-muġhāñ ho
is riñd ko jī bhar ke pilā kyuuñ nahīñ dete

rind kuchh kar rahe haiñ sargoshī
zikr-e-'mullā' se ḳhush-sifāt na ho