Tags-Rind

hai sar ḳhushī meñ tujhe pās-e-ġham-kashāñ 'mānī'
ajiib riñd-e-ḳhudā-tars-o-pāk-bāz hai tū

vaa.iz kī kaḌvī bātoñ ko kab dhyān meñ apne laate haiñ
ye rind-e-balā-nosh aise haiñ sunte haiñ aur pī jaate haiñ

riñd-e-ālī-maqām hai 'akbar'
bū hai taqvā kī aur sharāb kā rañg

ḳhidmat-e-rind qadah-nosh meñ ye be-adabī
jī meñ hai kāTiye dāñtoñ se zabān-e-vā.iz

riñd mustaġhnī haiñ duniyā se ġharaz ham ko 'azīz'
daulat-e-jam mil ga.ī jab haath meñ jaam aa gayā

jo lā-maz.hab ho us ko millat-o-mashrab se kyā matlab
mirā mashrab hai rindī riñd ko maz.hab se kyā matlab

huuñ maiñ ik āshiq-e-be-bāk o ḳharābātī o riñd
mujh se mat pūchh mire ilm-o-adab kā ahvāl

lag ga.ī in ko bhī shāyad tire kūche kī havā
mai-kada riñd ne zāhid ne haram chhoḌ diyā

jab pī lagā ke muñh dam-e-iftār riñd ne
botal ke muñh kī aa.ī farishtoñ ko bū pasand

vo rind haiñ na uThā.eñ bahār kā ehsāñ
varūd ham tirī ḳhalvat meñ be-havāla kareñ

vo riñd-e-pāk-tabī.at hai aap kā 'shā.ir'
sharāb bhī na piye aur jhūmtā bhī rahe

kyā baat thī ki ḳhalvat-e-zāhid ko dekh kar
rind-e-gunāhgār ne sar ko jhukā liyā

tañg ho kar tire har baar ke dahkāne se
kos baiThe na koī riñd-e-sharābī saaqī

saare rind aubāsh jahāñ ke tujh se sujūd meñ rahte haiñ
bāñke TeḌhe tirchhe tīkhe sab kā tujh ko imaam kiyā

samajhtā hai tū 'dāġh' ko rind zāhid
magar rind us ko valī jānte haiñ

ye baat talḳh hai magar ye baat guftanī bhī hai
ki zāhidān-e-ḳhud-nigar se rind-e-bā-safā bhale

gunāh kar ke bhī ham riñd pāk-sāf rahe
sharāb pī to nadāmat ne aab aab kiyā

rind khaḌe haiñ mimbar mimbar
aur vaa.iz ne pī rakkhī hai

mujh rind-husn-kār kī mai-ḳhvāriyāñ na pūchh
is ḳhvāb-e-jāñ-faroz kī bedāriyāñ na pūchh

kyā batā.ūñ ma.abad-e-tanhā.ī meñ mujh riñd ko
umr-bhar ke vāste kyuuñ mo.atakif honā paḌā