Tags-Rind

mohtasib gin le uñgliyoñ hī par
chand hī rind haiñ kamīnoñ meñ

paar utar jā.eñge bahr-e-ġham se riñd-e-bāda-nosh
le uḌegī kashtī-e-mai ko havā barsāt kī

ajiib 'ja.afar'-e-farḳhanda-jāñ kā mashrab hai
ki riñd ho ke bhī ḳhush-baḳht nek-nām rahā

kaash zāhid ruḳh-e-raushan se uThā leñ vo naqāb
phir to kuchh rind kī rindī hai na taqvā terā

qaazī ko jo riñd kuchh chaTā deñ
masjid kī baġhal meñ mai-kada ho

piine kā mazā jab hai ki muñh ḳhum se lagā hai
mujh riñd se saaqī ye kahe jaa.e ki haañ aur

ye riñd de ga.e luqma tujhe to uzr na maan
tirā to shaiḳh tanūr o shikam barābar hai

ḳharosh-e-ḳhum kā bharam kholnā hai kyā mushkil
bas ek rind-e-balā-nosh kī zarūrat hai

kyuuñ kar vo kisī miil ke patthar pe Thahar jaa.e
kyuuñ rind kī nisbat ho tire dair-o-haram se

vo rind kyā ki jo piite haiñ be-ḳhudī ke liye
surūr chāhiye vo bhī kabhī kabhī ke liye

shikva-ba-lab vo riñd haiñ saaqī aaj bhī tere maiḳhāne meñ
tishna-dahan baiThe haiñ lekin arz-e-talab bebāk nahīñ hai

bhaTTī meñ jo ho dafn koī bāda-kash-e-riñd
gumbad abhī ho jā.egā ḳhum-ḳhāna kisī kā

rind-e-ḳharāb-nosh kī be-adabī to dekhiye
niyyat-e-mai-kashī na kī haath meñ jaam le liyā

'iqbāl' kā har sher hai mai-ḳhāna-e-hastī
har riñd ko detā hai jo paimāna-e-hastī

qabīla-e-haram o qaum-e-dair o firqa-e-riñd
hamāre chāhne vaale kahāñ kahāñ nikle?

ham hī ik tanhā nahīñ 'tasnīm' mastāne hue
un kī nazreñ kyā uThīñ har riñd mastāna huā

mudām rind kareñ kyuuñ na āstāñ-bosī
haram hai shaiḳh-e-mashīḳhat-ma.āb ke ghar meñ

rind ḳhālī haath baiThe haiñ uḌā kar juzv o kul
ab na kuchh shīshe meñ hai baaqī na paimāne meñ hai

merī hastī kār-farmā hai jahāñ tak dekhiye
riñd huuñ maiñ jaam huuñ maiñ sāqi-e-mai-ḳhāna huuñ

ḳhair us meñ hai vaa.iz ki kabhī mai kī mazammat
karnā na kisī rind-e-ḳhush-atvār ke aage