Tags-Ritual

rasm-e-ārā.ish-e-aivān-e-tarab hai ki jo thī
sar-e-farhād ye vo koh-e-girāñ hai ki jo thā

aap ham ko sikhā.eñ rasm-e-vafā
mehrbānī hai mehrbānī hai

ab junūñ aap hai garebāñ-gīr
ab vo rasm-e-takallufāt ga.ī

vafā nahīñ na sahī rasm-o-rāh kyā kam hai
tirī nazar kā magar e'tibār bhī to nahīñ

man.a hai rasm-o-rivājoñ se baġhāvat karnā
ye sabaq mujh ko magar yaad nahīñ hone ke

rasm-e-vafā kā zikr to ab zikr rah gayā
vo paikar-e-vafā vo vafādār kyā hue

ta.alluq kī na.ī ik rasm ab ījād karnā hai
na us ko bhūlnā hai aur na us ko yaad karnā hai

bahut samjhe hue hai sheḳh rāh-o-rasm-e-manzil ko
yahāñ manzil ko bhī ham jāda-e-manzil samajhte haiñ

nibāh āsāñ nahīñ duniyā kī rasm-e-dost-dārī kā
koī dam-sāz hotā hai to ham meñ dam nahīñ hotā

buland hāthoñ meñ zanjīr Daal dete haiñ
ajiib rasm chalī hai duā na māñge koī

ye aarzū hai badal jaa.e rasm-e-shahr-e-vafā
udaas husn na ho ishq sar-garāñ na rahe

jahāñ nāsehoñ kā hujūm thā vahīñ āshiqoñ kī bhī dhuum thī
jahāñ baḳhiya-gar the galī galī vahīñ rasm-e-jāma-darī rahī

hamīñ ko dekh ke ḳhanjar nikālte the aap
hamāre baad to ye rasm phir adā na huī

tumhīñ kaho tumheñ nā-āshnā kaheñ na kaheñ
ki āshnā se adā rasm-e-āshnā na huī

uḌā hai rafta rafta rañg tasvīr-e-mohabbat kā
huī hai rasm-e-ulfat be-viqār āhista āhista

ai rasm-e-baġhāvat ke giraftār sipāhī
likkhī thī tire baḳht meñ ye haar sipāhī

ajiib rasm chalī hai ki is zamāne meñ
avaam dhuup meñ kursī hai shāmiyāne meñ

magar ai ham-qafas kahtī hai shorīda-sarī apnī
ye rasm-e-qaid-o-zindāñ ek dīvār-e-kuhan tak hai

dayār-e-husn meñ pābandī-e-rasm-e-vafā kam hai
bahut kam hai bahut kam hai ba-hadd-e-intihā kam hai

ham hī badleñge rah-o-rasm-e-gulistāñ yaaro
ham se vābasta hai ta.amīr-e-bahārāñ yaaro