Tags-Ritual

falak ne un ko atā kī hai ḳhvājgī ki jinheñ
ḳhabar nahīñ ravish-e-banda-parvarī kyā hai

in dinoñ rasm-o-rah-e-shahr-e-nigārāñ kyā hai
qāsidā qīmat-e-gul-gasht-e-bahārāñ kyā hai

ābād ham āshufta-saroñ se nahīñ maqtal
ye rasm abhī shahr meñ zinda hai ki tum ho

rasm-o-rivāj chhoḌ ke sab aa ga.e yahāñ
rakkhī huī haiñ taaq meñ ab ġhairateñ tamām

ik anokhī rasm ko zinda rakhā hai
ḳhuun hī ne ḳhuun ko paspā rakhā hai

maiñ ne kahā ki tum se mulāqāt hai bahut
har roz rasm-o-rāh-e-mudārāt hai bahut

kab se paḌī haiñ dil meñ tere zikr kī saarī rāheñ band
barsoñ guzre is bastī meñ rasm-e-salām-o-payām nahīñ

ḳhū bū rahī sahī thī jo mujh meñ ḳhulūs kī
ab vo bhī nazr-e-rasm-e-ināyāt ho ga.ī

rasm-e-jahāñ na chhūT sakī tark-e-ishq se
jab mil ga.e to pursish-e-hālāt ho ga.ī

tark un se rasm-o-rāh-e-mulāqāt ho ga.ī
yuuñ mil ga.e kahīñ to koī baat ho ga.ī

hameñ yaad ho to sunā.eñ bhī zarā dhyān ho to batā.eñ bhī
ki vo dil jo mahram-e-rāz thā kahāñ rasm-o-rāh meñ jal-bujhā

sabhī ko us kī aziyyat kā hai yaqīn magar
hamāre shahr meñ hai rasm-e-imtihān vahī

rasm-e-duniyā ke salāsil meñ giraftārī hai
mat Thaharnā ki kahīñ phāñs javāñ-tar ho jaa.e

ik rasm-e-bevafā.ī thī vo bhī huī tamām
vo yār-e-bevafā mujhe kitnā aziiz thā

aaj apne bhī parā.e se nazar aate haiñ
pyaar kī rasm zamāne se uThī jaatī hai

paḌ na jaa.e nagar meñ rasm-e-sukūt
qufl-e-lab toḌ de zabāneñ khol

maiñ māntā nahīñ ki vo ġhaflat-shi.ār hai
rasm-e-vafā ke zer-e-asar kis qadar huuñ maiñ

kaun qātil bachā hai shahr meñ 'faiz'
jis se yāroñ ne rasm-o-rāh na kī

shaiḳh sāhab se rasm-o-rāh na kī
shukr hai zindagī tabāh na kī

hañsne meñ bhī nihāñ haiñ yahāñ nāla-hā-e-dard
pāmāl rasm-e-ijz mirī bandagī nahīñ