Tags-Ritual

vo zulm shahr meñ hai ki andher hai koī
vābasta rasm-e-jashn-e-charāġhāñ se kaun hai

ye mahviyat hai ki ro.ab-e-jamāl hai taarī
ḳhilāf-e-rasm-e-junūñ dil bahut muaddab hai

barq ban kar but-e-māzī ko girāne de mujhe
rasm-e-kohna ko tah-e-ḳhāk milāne de mujhe

ḳhalish-e-tīr-e-be-panāh ga.ī
lījiye un se rasm-o-rāh ga.ī

maiñ huuñ yaqīn meñ gum aur vo gumān meñ gum
tamām rasm-e-mohabbat hai darmiyān meñ gum

huuñ munharif na kyuuñ rah-o-rasm-e-savāb se
TeḌhā lagā hai qat qalam-e-sarnavisht ko

kyā kareñ rasm-e-zamāna kī shikāyat 'tābāñ'
dard se rakhte haiñ ham log sadā kā rishta

'sahar' ab hogā merā zikr bhī raushan-dimāġhoñ meñ
mohabbat naam kī ik rasm-e-bejā chhoḌ dī maiñ ne

le ke dil mehr se phir rasm-e-jafā-kārī kyā
tum dil-ārām ho karte ho dil-āzārī kyā

bilā-ġharaz saada saada bātoñ se Daal deñ rasm dostī kī
jo silsila is tarah chalegā vo lāziman pā.edār hogā

tirī āvāz mire vāste sahrā kā sukūt
merī ḳhāmoshī rah-o-rasm-e-duā Thahregī

ham ne hastī aur adam kī aa ke kī hai ḳhuub sair
rasm o aa.iiñ dekh in logoñ kā az bas Dar ga.e

un se har chand rasm-o-rāh nahīñ
silsila ġham kā phir barābar hai

hameñ nā-āshnā samjho na rasm-o-rāh-e-manzil se
kahāñ le jā rahā hai zauq-e-rusvā.ī samajhte haiñ

tajdīd-e-rasm-o-rāh-e-mulāqāt kījiye
mujh se nazar milā ke zarā baat kījiye

zamīñ bhī terī hai ham bhī tere ye milkiyat kā savāl kyā hai
ye qatl-o-ḳhūñ kā rivāj kyuuñ hai ye rasm-e-jañg-o-jidāl kyā hai

tū hī muhaqqiq tū hī mujaddid banā hai tū aap hī muqallid
tū rasm-o-rah kā huā muqayyad phañsā hai ḳhud mā-o-man ke andar

beḌī bane haiñ kuchh to yahāñ rasm aur rivāj
yuuñ 'gīt' ko qafas se nikalvā.iye zarā

dosto rasm-e-mohabbat pe ye kyā bait ga.ī
shahr-e-yārāñ meñ koī shaḳhs sar-e-dār na thā

chalo ik baar phir dār-o-rasan kī āzmā.ish ho
chalo ik baar phir rasm-e-sitam-gārī badalte haiñ