Tags-Ritual

maanā ki yahāñ apnī shanāsā.ī bhī kam hai
par tere yahāñ rasm-e-pazīrā.ī bhī kam hai

ā.inoñ se pahle bhī rasm-e-ḳhud-numā.ī thī
dil shikār hote the aisī dilrubā.ī thī

ek rasm-e-sarfaroshī thī so ruḳhsat ho ga.ī
yuuñ to dīvāne hamāre ba.ad bhī aa.e bahut

jab se is bazm kā dastūr banī mohr-labī
rasm-e-īhām-o-ishārāt chalī jaatī hai

un se vo rasm-e-mulāqāt chalī jaatī hai
ye bhī sau baat meñ ik baat chalī jaatī hai

ye merī pyaas ke sāġhar tere laboñ kī sharāb
ravāj-o-rasm-e-mohabbat kā mojaza hogā

ek huā dīvāna ik ne sar teshe se phoḌ liyā
kaise kaise log the jin se rasm-e-vafā kī baat chalī

hairāñ hai aañkh chashm-e-ināyat ko kyā huā
duniyā meñ rasm-o-rāh-e-mohabbat ko kyā huā

dekh aao marīz-e-furqat ko
rasm-e-duniyā bhī hai savāb bhī hai

hai har ek baat meñ ab kajī ki chalan nikāle haiñ aur hī
na vo rabt hai na vo dostī na vo rasm hai na vo raah hai

kuchh ab ke rasm-e-jahāñ ke ḳhilāf karnā hai
shikast de ke adū ko maaf karnā hai

rāh-o-rasm-e-ibtidā.ī dekh lī
intihā-e-bevafā.ī dekh lī

phir na.ī ḳhvāhish ke zarroñ se banā.eñge nagar
phir na.ī rasm-e-talab rasm-e-vafā lā.eñge log

ye bhī ik rasm-e-ta.alluq hai ba-qadr-e-āgahī
baat ka.abe kī jo aa.ī zikr-e-but-ḳhāna chalā

dhaar par apne ta.aqqul ko chaḌhā jā.ūñgā
rasm-e-āzādī-e-afkār uThā jā.ūñgā

maiñ bas ye kah rahā huuñ rasm-e-vafā jahāñ meñ
bilkul nahīñ miTī hai kamyāb ho ga.ī hai

ai shaiḳh vo basīt haqīqat hai kufr kī
kuchh qaid-e-rasm ne jise īmāñ banā diyā

bulbul ba-āh-o-nāla va gul mast-e-rañg-o-bū
mujh ko shahīd-e-rasm-e-gulistāñ banā diyā

tum jaano tum ko ġhair se jo rasm-o-rāh ho
mujh ko bhī pūchhte raho to kyā gunāh ho

dil liyā jis ne bevafā.ī kī
rasm hai kyā ye dilrubā.ī kī