Tags-Ritual

rasm hī shahr-e-tamannā se vafā kī uTh jaa.e
is tarah to na koī ahl-e-mohabbat ko satā.e

sharīk-e-rasm-e-girya haiñ samundar-āshnā āñkheñ
jahān-e-ārzū meñ kar na deñ mahshar bapā āñkheñ

mauqūf hai laboñ kī tabassum se rasm-o-rāh
āh-o-fuġhāñ vazīfa-e-shām-o-sahar hai aaj

vahī ahd-e-rasm-o-rah-e-vafā vo dil-o-nazar kā mo.āmla
mujhe yaad hai mire mohtaram tumheñ yaad ho ki na yaad ho

jinheñ mujh se hai ye gila ki maiñ rahī be-niyāz-e-ḳhulūs-o-rabt
mere gird rasm-o-rivāj kā kabhī dā.era bhī to dekhte

shab-ḳhūñ kī rasm aisī paḌī ahl-e-shahr meñ
logoñ se lamha bhar ko bhī soyā na jā sakā

yahāñ kī rasm hai 'sahbā' kasād-bāzārī
ye jins-e-dil hai baḌī be-bahā dukāñ se uThā

haqīqat meñ karam tum ne kiyā hai haq-shanāsoñ par
har ik ko vāqif-e-rasm-e-jabīn-o-āstāñ kar ke

phuul ke rañg sar-e-shāḳh-e-ḳhizāñ bhī chamke
qaidī-e-rasm-e-chaman ḳhaak ke jauhar na hue

hameñ to baaġh kī taklīf se muaaf rakho
ki sair-o-gasht nahīñ rasm ahl-e-mātam kī

bujhte bujhte bhī huī ātish-e-jāñ tez bahut
aur jo rasm thī baaqī vo sharāre kī huī

vo kā.enāt-e-mohabbat huī nazar ojhal
fusūñ-tarāzī-e-rasm-e-vafā bhī yaad nahīñ

muāmalāt-e-mohabbat to yaad kyā rahte
vo rasm-o-rāh kā ab silsila bhī yaad nahīñ

ye kah ke yaad kareñge 'hafīz' dost mujhe
vafā kī rasm ko pā.inda kar gayā koī

ik pās-e-rasm thā jise ham ne nibhā diyā
ab vo kiye pe apne pashemāñ huā to kyā

dīvār hai duniyā ise rāhoñ se haTā de
har rasm-e-mohabbat ko miTāne ke liye aa

pahāḌ mere tahavvur kā isti.āra hai
maiñ pastiyoñ se bhalā kaise rasm-o-rāh karūñ

sitam sikhlā.egā rasm-e-vafā aise nahīñ hotā
sanam dikhlā.eñge rāh-e-ḳhudā aise nahīñ hotā

ta.aziyat kī khokhlī hai rasm jaarī āj-kal
is tarah se ho rahī hai ġham-gusārī āj-kal

pahle bhī tavāf-e-sham-e-vafā thī rasm mohabbat vāloñ kī
ham tum se pahle bhī yahāñ 'mansūr' hue 'farhād' hue