Tags-Ritual

ye rasm-e-āmad-o-raft-e-dayār-e-ishq taaza hai
hañsī vo jaa.e merī aur ronā yuuñ chalā aave

ga.ī hai kaisī zamāne se rasm-e-sar-garmī
ajab nahīñ hai jo patthar meñ bhī sharār na ho

ai dil-e-dard-āshnā husn se rasm-o-rāh kar
ishq hai bā.is-e-najāt shauq se to gunāh kar

ab to aa jaao rasm-e-duniyā kī
maiñ ne dīvār bhī girā dī hai

bahut se rog duā māñgne se jaate haiñ
ye baat ḳhūgar-e-rasm-e-davā se kaun kahe

rasm-e-mehr-o-vafā kī baat kareñ
phir kisī dilrubā kī baat kareñ

duniyā meñ 'bahr' kaun ibādat-guzār hai
saum-o-salāt dāḳhil-e-rasm-o-rivāj hai

jaane vāloñ se rābta rakhnā
dosto rasm-e-fātiha rakhnā

kahte haiñ ki uThne ko hai ab rasm-e-mohabbat
aur is ke sivā koī tamāshā bhī nahīñ hai

kabhī bulāo, kabhī mere ghar bhī aayā karo
yahī hai rasm-e-mohabbat, ise nibhāyā karo

mahram-e-rāz-e-haram huuñ vāqif-e-but-ḳhāna huuñ
maiñ rah-o-rasm-e-mohabbat kā magar dīvāna huuñ

badal ga.e haiñ zamāne ke saath husn ke taur
kuchh aur chāhte ab rasm-e-āshiqī ke liye

ishq aur zideñ ye rasm o raah kī
haa.e duniyā uf rī duniyā-dāriyāñ

agar ḳhāmosh kar bhī dī zabāñ rasm-e-mohabbat meñ
sar-e-mahfil magar 'shāyān' kā kirdār bolegā

shaiḳh sāhab se rasm-o-rāh na kī
shukr hai zindagī tabāh na kī

rabt-e-bāham thā faqat lafz-o-bayāñ kā irtibāt
hai koī rasm-e-vafā bhī darmiyāñ samjhā thā maiñ

hai istilāh-e-mohabbat meñ jis kā naam junūñ
vo ek rasm baḌī pā.edār guzrī hai

jaise rasm adā karte hoñ shahroñ kī ābādī meñ
sub.h ko ghar se duur nikal kar shaam ko vāpas aane meñ

ta.ajjub kyā agar rasm-e-vafā yuuñ bhī hai aur yuuñ bhī
ki husn o ishq kā har mas.ala yuuñ bhī hai aur yuuñ bhī

utne hī ho ga.e ham manzil-e-irfāñ ke qarīb
jis qadar rasm-o-rah-e-dahr se begāna bane