Tags-Ritual

rasm-e-ulfat se hai maqsūd-e-vafā ho ki na ho
zaḳhm-e-dil aur ho ḳhūn-basta-e-shifā ho ki na ho

sach kahūñ 'āmir' ki ab us daur meñ jiite ho tum
rasm-e-ulfat bhī jahāñ suud o ziyāñ hone lagī

ab āh-e-zer-e-lab hai bazm kī rasm
isī rau meñ baho āhista bolo

chūḌiyāñ bikharne kī
rasm ye purānī hai

kavvoñ ke aage guñg haiñ kyā tūtiyāñ ki bulbuleñ
ahl-e-chaman haiñ mutma.in rasm-e-suḳhan jaarī to hai

har baat hai 'ḳhālid' meñ pasandīda o matbū
ik pairvī-e-rasm-o-rah-e-ām nahīñ hai

buland hāthoñ meñ zanjīr Daal dete haiñ
ajiib rasm chalī hai duā na māñge koī

tumheñ 'hafīz' se nafrat hai to ye fikr hai kyuuñ
kisī hasīn se vo rasm-o-rāh kar na sake

kal jo thā tarz-e-jahāñ aaj kahāñ hai baaqī
saath de saktī nahīñ aaj kā vo rasm-e-kohan

naanī ne tark kar dī kyuuñ rasm-e-qissa-goī
kyā chāñd se kisī ne charḳha uThā liyā hai

ye qā.eda rasm-o-rāh kā hai ḳhayāl donoñ taraf ho yaksāñ
kisī ko parvā na hogī jis dam kisī kī parvā na kījiyegā

ab to muddat se rah-o-rasm-e-nazāra band hai
ab to un kā tuur par bhī sāmnā hotā nahīñ

ik galī se ḳhushbū kī rasm-o-rāh kaafī hai
laakh jabr mausam ho ye panāh kaafī hai

jahez kam thā bahū aag meñ utārī hai
hamāre gaañv meñ ab tak ye rasm jaarī hai

kahāñ pahlī sī rāh-o-rasm-e-ulfat
na.e dastūr hote jā rahe haiñ

ab kisī kī zabāñ nahīñ khultī
rasm jaarī hai muñh-bharā.ī kī

zindagī tujh ko kahīñ par to Thaharnā hogā
rasm-e-duniyā ko nibhāte hue marnā hogā

jab se haiñ apne parā.e bezār
rasm duniyā kī uThā.ī thī kabhī

chal paḌī rasm jo kaj-fahmī kī
baat kyā phir koī kar pā.egā

iḳhlās se aarī hai ab pursish-e-ġham ai dil
ye rasm hī duniyā se uTh jaa.e to achchhā hai