Tags-Rukhsar

pahle nazr lab-o-ruḳhsār karegī duniyā
phir tujhe bar-sar-e-paikār karegī duniyā

jalva-e-ruḳhsār-e-sāqī sāġhar-o-mīnā meñ hai
chāñd uupar hai magar Duubā huā dariyā meñ hai

paḌā hai aks jo ruḳhsār-e-shola-e-mai kā
to ā.īne tirī yādoñ ke jagmagā.e haiñ

har aan ḳhushī se aapas meñ sab hañs hañs rañg chhiḌakte haiñ
ruḳhsār gulāloñ se gul-gūñ, kapḌoñ se rañg Tapakte haiñ

dil ke asrār chhupāte haiñ vo ham se 'shā.ir'
ham ki rañg-e-lab-o-ruḳhsār samajh lete haiñ

jin kī nazar chaḌhā tirā ruḳhsār-e-ātishīñ
un kā charāġh-e-gor na tā-hashr gul huā

sadqe chakor hote haiñ ruḳhsār-e-yār ke
vo māh-e-chār-dah mah-e-tābāñ hai in dinoñ

chhup chale haiñ ḳhat-e-shab-rañg se ruḳhsār-e-sabīh
din hai kam shaam ke āsār ayaañ saare haiñ

ai 'valī' kyuuñ sun sake nāseh kī baat
jo divānā hai parī-ruḳhsār kā

chāhtā hai is jahāñ meñ gar bahisht
jā tamāshā dekh us ruḳhsār kā

dekhnā har sub.h tujh ruḳhsār kā
hai mutāla matla-e-anvār kā

sīrat na ho to āriz-o-ruḳhsār sab ġhalat
ḳhushbū uḌī to phuul faqat rañg rah gayā

ḳhalq ne qur.ān dekhā jab huā māh-e-rajab
ham ne dekhā mus.haf-e-ruḳhsār apne maah kā

terī peshānī-e-rañgīñ meñ jhalaktī hai jo aag
tere ruḳhsār ke phūloñ meñ damaktī hai jo aag

jab bhī zindāñ meñ asīroñ ko milā muzhda-e-gul
merī nazroñ meñ tumhāre lab-o-ruḳhsār aa.e

ruḳhsār kā shaidā huuñ kyā gul ko samajhtā huuñ
mahv-e-ḳhat-e-zebā huuñ raihāñ kise kahte haiñ

dil bujh gayā to garmī-e-bāzār bhī nahīñ
ab zikr-e-bāda-o-lab-o-ruḳhsār bhī nahīñ

sub.h meñ der hai to phir ik baar
shab ke ruḳhsār se Dhalak dekhūñ

chiñgāriyāñ uThtī haiñ to lagtī haiñ hameñ phuul
jādū-e-bahārāñ haiñ dahakte hue ruḳhsār